想BB乾淨先係最難嘅事 父母覺得好污糟嘅4個BB行為

BB出世後，爸爸媽媽會比起以前更注重衛生，BB嘅一切物品都必須要清潔／消毒乾淨，就連熟悉嘅親朋好友想掂BB，都會要求先洗手，斷絕一切有機會令BB生病嘅途徑。但偏偏BB就係最「唔合作」嘅一個，經常做啲令父母見到都不禁搖頭嘆息嘅行為，尤其係以下4個行為。

1. 周圍執垃圾

BB對咩都會感到好奇，會想拎上手研究一番，就連垃圾都唔例外。當BB可以自由移動，手指可以運用自如去執起細小物件嗰陣，地上有飯粒、頭髮、食物碎等，都通通逃唔過BB嘅法眼，會將呢啲小垃圾執起嚟，當爸爸媽媽見到BB呢個舉動，都會立即搶去BB手上嘅垃圾，非常怕BB會放入口。

2. 咩都放入口

除咗平時玩開嘅玩具，BB一拎到新物件，都會習慣想放入口，試下係咩味。但爸爸媽媽就會好擔心BB拎嘅嘢未抹乾淨、未消毒會令BB輕易感染上腸胃炎等疾病，更可怕嘅係BB會拎到細小物件當食物咁吞落肚。

3. 吮手指腳指

BB喺屋企行嚟行去，又周圍摸嘢，手手腳腳都會黐上塵埃、垃圾⋯⋯呢個時候如果BB吮手指或腳指，都咪話唔污糟呀！

4. 咬住張被瞓覺

好多BB對自己張被餘情有獨鍾，唔鍾意爸爸媽媽拎走被仔去洗之餘，仲好鍾意咬住張被瞓覺，見到BB張被又濕又一陣口水味，真係令爸爸媽媽忍唔住皺晒眉。

Text: Mami Editorial