為咗BB 媽媽咩都可以豁出去 3個媽媽行為令旁人覺得好惡頂

做咗媽媽後，對住BB總會做好多連自己都料想唔到嘅舉動，呢啲舉動喺旁人眼中更會覺得係匪夷所思，特別係以下呢3個行為。

1. 聞BB個屁股

有時見到BB靜咗唔郁，或表情有啲怪異，媽媽都會秒懂係BB要屙臭臭嘅訊息，所以會將頭貼近BB個屁股，聞下BB屙咗臭臭未，而旁人就會覺得媽媽好奇怪，無啦啦去聞BB個屁股。

2. 仔細觀察BB嘅便便

BB嘅便便最能夠反映BB嘅健康，所以媽媽都會好仔細觀察BB大便嘅顏色、形態，有時遇到BB幾日冇大便，媽媽甚至會用棉花棒「撩」開便便，睇下便便內有咩未消化嘅食材，而判斷BB嘅便便係幾耐之前嘅宿便，但呢個舉動喺旁人眼中就會覺得好核突，認為媽媽喺到「玩屎」。

3. 起勢聞BB身上嘅氣味

好多媽媽對BB身上嘅氣味都情有獨鍾，尤其是初生BB，身上總帶有一陣奶香味，所以媽媽好多時喺抱起BB嘅時候，都會猛索BB個頭或身上陣味，會覺得好滿足同好減壓！但旁人就會覺得媽媽呢個行為好「痴漢」。

其實呢啲行為都係媽媽愛BB嘅表現，因為緊張自己嘅BB，所以無論幾核突都好，媽媽都心甘情願去做，換著第二個，媽媽先唔肯呀！

Text: Mami Editorial