8個BB生活小表現 證明你生咗一個聰明BB！

好多BB細細個就已經有唔同動作，鬼鬼馬馬。原來可以從BB嘅表現中，睇得出BB係唔係高智商。如果BB會出現以下2項表現以上，就恭喜你喇！你生咗個聰明BB呀～

1.行為好似管家，屋企所有人都要由佢「安排」

有啲BB會好鍾意「安排」身邊嘅人，例如：拖媽媽坐某一個位置、安排爸爸瞓覺要瞓係邊，或者要求屋企公仔要放邊，通常有依啲「小管家」行為嘅BB，領導力同組織能力都較高，對於日後發展都好有利。

2.記憶力強，留意到身邊事物嘅分別

好多BB細個嘅時候都比較懵懂，但如果BB會發現身邊事物有唔同或者識將類似物件組合，證明BB記憶力唔錯！例如：BB發現今日食飯嘅餐具唔同咗、新買嘅玩具同之前見到嘅公仔係一樣，例如買左個米奇公仔，佢會揾返本米奇圖書畀你睇，都可以證明BB記憶力強。記憶力強嘅大BB甚至可以將媽媽成日唱嘅歌，大致哼一次，都係記憶力強嘅表現。

3.受到小小刺激就會笑

有研究指出，鍾意笑嘅BB通常較聰明。如果BB只要受到外界小小刺激就會發笑，或者笑嘅次數較多，喺學習上容易掌握要點，依類BB較其他BB容易接受新事，對學習較有興趣。

4.充滿好奇心，喜歡每事問

一般人如果對外界事情有強烈好奇心，都有助了解世界，屬於知識型。充滿好奇心嘅BB並唔係指，細細個就問有關世界宇宙嘅問題，而係鍾意每事問，佢會從提問中發現身邊事物嘅邏輯性，例如，問媽媽去邊度？爸爸點解要返工之類⋯⋯依類BB思維往往比較敏捷，而且，表達能力都比其他BB強，有善於對問題進行研究嘅能力。

5.鍾意模仿，觀察力強

BB細細個就已經開始學習模仿，好多人都會話BB跟邊個跟得多，就會似邊個。BB喺模仿嘅過程中，需要細心觀察，然後將事物重點記低，最後進行模仿，例如，有啲BB會扮花，扮老人家，扮聲，依啲表現都證明BB專注力同記憶力較強。

6.對數字特別敏感、鍾意記數字

如果BB好鍾意玩關於數字嘅遊戲，例如數數、或者用數字玩遊戲時會特別興奮，甚至可以好快記住一連串數字，都證明BB嘅邏輯同思維能力都係好好！

8.鍾意音樂，聽到音樂會手舞足蹈

有啲BB只要一聽到音樂，就會跟住音樂唱，甚至開始跟住節奏跳舞，有依類表現嘅BB，音樂天賦一般都會比較高，亦證明BB右腦比較發達，所以先會表現出依個小天賦。

7.對文字有興趣，愛上睇書

一般BB喺1歲多就可以講到一啲簡單詞語，如果發現喺講故事時，BB會模仿你講一啲詞語，或者時不時自己主動拎書嚟睇，喺到吱吱吾吾「講故事」，都代表BB語文能力較強。

唔同嘅BB都會有唔同嘅特徵，爸爸媽媽可以細心觀察BB行為，可能會發現BB一啲小潛能㗎！

Text：Mami Editorial

Photos：Printerst