爺爺只能接走孫女到英國生活兩兄妹問點解要分開？

By race.cheng on 03 Jan 2019

英國時裝品牌高層被中國妻子殺害後，一對仔女由女方家人照顧。喺英國嘅爺爺想將一對孫接返嚟自己照顧，但中國親家竟然索價逾63萬港元，之後又反口拒絕爺爺帶走男孫，最後爺爺花咗超過10萬英鎊爭奪孫嘅撫養權，外國媒體形容事件係「血淋淋嘅敲詐」。

34歲Michael Simpson與老婆傅薇薇喺2017年已分居，但傅薇薇其後因妒忌，帶刀闖到Michael上海嘅住宅，當時一對仔女喺房間休息。傅薇薇先刺傷Michael女友，並喺Michael報警時再用刀插死Michael。

傅薇薇其後被判終身監禁，但兩名仔女Jack同Alice就被安排由公公婆婆照顧。喺爸爸過世後，Jack同Alice無法接受教育，並同公公婆婆同其他親戚一齊住喺一個小單位內。其間，69歲爺爺Ian想探望佢哋都只可以見面5小時。Lan見一對孫生活環境變差，所以決定向親家爭奪撫養權。

傅薇薇嘅家人一開始開出條件指，如果要得到兩個孫嘅撫養權，就需要每年畀63萬港幣，以作由上海到英國嘅旅行費。但到2018年10月，親家反口指只能帶走Alice，並需要支付9.2萬港元，否則一拍兩散。

Lan代表律師指，對方要求係幾乎接近販賣兒童嘅非法行為，但由於外國人喺中國爭取撫養權嘅官司金額太大，Lan無可奈何只可以暫時接走孫女，亦指留低Jack係心痛嘅選擇，覺得對唔住Jack。

6歲Alice同8歲Jack係直到爺爺爭取撫養權時，先知爸爸過世。兩兄妹被拆散後都好傷心，Jack喺Alice離開時不斷話：「唔好畀妹妹走」，Alice更不斷揾哥哥，Lan見情況就更加內疚，但向Jack承諾：「唔好驚，爺爺好快會接走你」。Lan指雖然官司唔完美，但都可以成功帶走Alice都係一件好事，可惜又內疚留低Jack，所以會為Jack再努力，希望可以一家人團聚，令一對孫有更好生活。