推住BB車心很累 孭住BB身又攰

推住BB車心很累 孭住BB身又攰

家庭關係
Byrace.cheng on 28 Dec 2018

每次出街都會掙扎究竟孭帶好定推BB車,如果去得遠,BB車就應該係首選,但如果撞正節日,出面又多人,推住BB車一定會好麻煩,每次都要諗一大輪,因為推車真係會遇到好多問題,你又有無試過?

shutterstock_1240180648

1.等極升降機都入唔到

有台灣網民喺網上帖文指,每次推住BB車去行百貨公司等升降機等極都入唔到,引來好多媽媽有共鳴。原來有唔少媽媽都有類似經驗,就係每次等升降機都發現係客滿,但升降機入面嘅人未必一定要搭。苦等一大輪後,終於有位入,但因為推住BB車無其他人咁敏捷,所以又被人打尖。有媽媽因為頂唔順,所以選擇搬BB車行樓梯,結果一個女人仔就從一樓搬BB車搬到上六樓。

2.唔可以落電梯 但客用升降機九丈遠

推住BB車更係唔可以落電梯,但有時真係少啲堅持都唔得。好多商場嘅升降機一係好隱蔽,揾成個鐘都未必揾到,一係就離門口九丈遠,眼見一落電梯就係門口,都要堅持唔用電梯。但如果去搭升降機,就會兜一個大圈,加埋揾升降機嘅時間,就可能會用咗成個鐘。本來一分鐘解決嘅事,結果要成個鐘。所以媽媽又點可以自己一個推住BB車出街行呢?

3.落雨推車仲輪盡

「落雨就唔好帶BB出街喇」但有時逼住落雨出街,又要拎好多嘢,就唯有推BB車,雖然BB車有雨擋罩,但如果係大BB就會不斷揭開,結果又要遮自己,又要遮BB。一上落斜,又係另一個困境,路途中就好似打仗咁,所以落雨好似有不明文規定:「唔好拎咁多嘢,唔好推BB車同出街!」

廣告
廣告

shutterstock_1203394561

4.推BB車搭交通工具好尷尬

香港人多地窄,幾乎每分每刻都有好多人。選擇搭地鐵都一定要擇個「吉時」。有媽媽試過因為要帶BB睇醫生,撞正放工時間,幾乎永遠都無機會塞到上車,結果好似麻煩到好多人,真係好尷尬。就算喺一般時間,唔少人都會覺得你上火車會霸住好多位。努力嘗試將BB車泊埋一邊,但係落車嘅時候就變災難,要係咁講唔好意思,要勞師動眾出車門,結果可能被人賞臭臉。

試過搭的士,但因為得自己一個湊BB,又要收車、又要抱BB,結果要麻煩的士司機幫手都會唔好意思,有時更要預咗的士司機會收行李費。試過有媽媽落車嘅時候,被後面嘅車響咹,嚇咗BB一跳!

shutterstock_591945119

其實BB車有佢一定嘅好處,如果出遠門,又自己一個湊BB,BB車可以幫到好多忙,例如變成BB休息地方,BB要瞓覺,一定係瞓喺BB車會舒服啲,或者如果突然揾唔到洗手間,BB車可以變做「緊急避護站」,喺BB車到幫BB換片。唔好以為孭住BB就得喇,但出遠門,要孭住BB成日又可能會有勞損,因為媽媽又要孭住BB袋,又要孭BB,真係聽都覺得攰呀!

Text:Mami Editorial

Photos:Shutterstock

🤱🏻 追蹤我們的 Instagram mamidaily.hk 看更多育兒教育資訊
Share to Facebook