媽媽嘅時間都用喺邊？ 3件最花媽媽時間嘅事

好多媽媽會覺得一日24小時都唔夠用，所有事都希望可以按既定嘅時間完成，但係偏偏照顧BB有好多變數，總會遇到某啲情況令媽媽要花更多嘅時間先可以完成，有時令媽媽都會覺得心好累。

1. BB飲飲下奶瞓咗

餵BB飲奶，但BB飲咗一半就瞓咗，心急嘅媽媽都會怕BB食唔飽好快餓，又唔想倒咗樽奶咁浪費，通常都會想整醒BB，希望BB飲多少少奶先再瞓。但奈何熟睡中嘅BB無論點整都唔醒，媽媽通常花咗好多時間喺叫醒BB繼續飲奶嘅舉動上，最後都唯有放棄，等BB瞓醒後再重新開過樽奶畀BB。

2. 掃風冇打嗝

BB飲完奶掃風係一件非常重要嘅事，有時BB掃兩下就打嗝會令媽媽非常開心，但有時BB掃風掃足半個鐘、用晒所有手法都就係唔打嗝，就會令媽媽覺得好沮喪，為怕BB嘔奶，好多時媽媽都唯有再抱多BB一陣，然後將BB側躺放喺床上。

3. 泵唔清奶

餵人奶嘅媽媽都會好怕遇到嘅問題，就係乳房無論親餵／泵咗幾耐都好，都仲有硬塊存在，表示奶未排空／阻塞，通常媽媽都要花更多時間去按摩、熱敷、轉唔同手法想令乳汁排空，避免進一步惡化成乳腺炎。

Text: Mami Editorial