睇下你有冇試過畀BB呢啲行為呃過？ BB常見嘅3個古惑行為

BB一直給予人純真可愛嘅感覺，但係有時爸爸媽媽會感受到呢個「小天使」會有啲古惑嘅行為，但係好多時都會不虞有詐，直到發現BB露出破綻先知道，原來自己被BB呃咗！

1. 詐喊

通常係BB第一個會學識嘅古惑行為，為咗吸引爸爸媽媽嘅注意，BB都會扮喊令爸媽心軟去抱起自己，或獲得各種想要嘅嘢。但當發現BB喊咗咁耐，一滴眼淚都冇，爸爸媽媽就知道自己上當喇！不過，就算BB係真喊定詐喊都好，爸爸媽媽都會第一時間滿足咗BB先，畢竟就算BB真係詐喊，都係需要爸爸媽媽關注自己啫，如果無傷大雅嘅，滿足下BB又何樂而不為！

2. 扮咳

有啲BB一飲水就會咳兩下，一開始會令爸爸媽媽好緊張BB係咪濁親，而停手唔再餵BB飲水住。但當發現BB飲奶、果汁都冇咳，一換返飲水先會咳，就知BB係「扮嘢」！

3. 匿埋

爸爸媽媽同BB最常玩嘅相信都係躲貓貓遊戲，爸爸媽媽搵嘢擋住自己塊臉，再拎開嗰刻通常都會令BB驚喜到笑唔停。有時BB都會想調轉角色，自己匿埋等爸媽搵自己，有時喺門後，有時喺被內⋯⋯但好多時BB都會「露出馬腳」，如張被只遮住自己塊臉等，當爸爸媽媽一捉到自己，就會笑到卡卡聲！

當BB學識呢啲古惑行為，代表住BB開始有思考能力，爸爸媽媽都會感到好欣慰，因為BB真係長大喇！

Text: Mami Editorial

Photo Source： Pinterest