由反感到需要 常令父母掙扎使用嘅2樣育兒物品

做咗父母就會知道，養育小朋友係一啲都唔容易嘅事，由BB喺初生開始，會擔心頸唔夠硬會整傷BB； 到會翻身，又擔心BB會碌落地下；到識行識走，就擔心BB會甩開爸爸媽媽嘅手，一去冇回頭⋯⋯無論小朋友長大到咩階段，都總會有令人擔心嘅地方，為咗照顧／保護好小朋友，爸爸媽媽好多時都需要借用唔同嘅工具幫手，雖然有時會惹嚟旁人嘅側目，唯有當事人先知呢2樣物件係有其可取之處。

1. 「防走失帶似拖狗散步」

當BB到1歲左右，就會開始學識行路，當逐漸掌握到行路技巧，行得愈嚟愈好嘅時候，BB一旦見到新奇有趣嘅事物，就好似一隻脫韁嘅野馬一樣，唔畀爸爸媽媽拖實，會大力甩開爸爸媽媽嘅手，即使畀爸爸媽媽抱起，都會使勁掙扎要落地，所以為免BB一落地就冇回頭，或喺人多嘅地方會走失或追唔到，好多爸爸媽媽都選擇用防走失帶將BB同自己連繫住。

但防走失帶曾惹起熱烈討論，有人批評：「好似拖狗出街咁！」、「咁細慢慢教咪得！」、「咁細走得幾遠？要追實追到！」有持相反意見嘅人表示，「同咁細嘅BB講道理就好似對牛彈琴。」、「每個小朋友嘅特性都唔一樣，適用自己嘅方法唔等於其他人都適用。」、「似唔似拖狗散步其實都係好主觀嘅諗法。」

其實，防走失帶都係因應部分家長需要而衍生嘅產品，令小朋友唔容易甩開父母而跑到睇唔到／危險嘅地方。畢竟，自己小朋友嘅安全係首要考慮嘅事，加上防走失帶只係用於短時間，當小朋友開始聽得明道理，自然唔需要再用。

2. 「手機／平板電腦係電子奶咀」

唔好話小朋友，好多大人都會沉迷喺手機嘅世界裡面。好多時當爸爸媽媽想引開BB嘅注意力一段時間，以方便做某啲行為，如：為BB吸鼻水，都會用手機開一啲影片畀BB睇。但有好多家長都唔建議呢個做法，認為電子屏幕會傷眼、易令BB沉迷等等。

但亦有家長無奈表示，BB唔明白爸爸媽媽想對自己做咩事，講亦唔會聽得明，但又要令BB唔掙扎先可以令父母做到某啲舉動。當所有玩具都失效後，唯有用手機開著屏幕畀BB玩，先可以令BB安靜落嚟，與其要小朋友狂喊不止，不如快快用手機吸引住BB，等爸爸媽媽搞掂晒先拎開手機。

凡事總有正反兩面，爸爸媽媽喺用每樣工具之前，都應該衡量優點同缺點，以對BB有最大利益、最少壞處為首要考慮。

Text：Mami Editorial

Photo Source： Pinterest