老公豪洗7位數迎娶 江若琳走出抑鬱展開新一頁

30歲江若琳Elanne同37歲「生煎包王子」蕭潤邦Oscar成功拉埋天窗，老公豪花7位數字舉辦世紀婚禮，婚宴筵開45席，場面相當震撼，而且有好多藝人都到場慶賀，Elanne喺社交網站同大家分享結婚相時話，影結婚相當日，一直難以想像，再唔係同拍廣告嘅人影結婚相。

江若琳同相識十年嘅「好兄弟」Oscar拍拖唔夠一年就宣佈要結婚，雖然認識咗咁耐，但Elanne一直都無諗過原來依位「兄弟」就係自己嘅Mr. Right。Elanne憶述當日影結婚相指：「入行10年，拍過好幾次婚紗廣告，每次拍戲基本上都係要著婚紗，我以為我已經麻木晒，但今次終於黎真啦，望住眼前呢位人兄，佢唔係你拍廣告既拍檔，唔係你拍戲既對手，而係我人生往後幾十年最想互相折磨既最強對手！原來仍然會好感動架喎，不過當我望住佢，我腦入面不停飄黎，點解會係你既，我地識左好耐啦喎，咁神奇既？」

圈內好多藝人都為Elanne同Oscar感動，結婚場面都可以見到Elanne同Oscar喺圈內人緣相當好，唔少藝人擔任兄弟姊妹團，兄弟團有張繼聰、JW（王灝兒）男友Tarzan、DJ當奴等；姊妹團則有JW、黎美言、張惠雅、張紋嘉等，而謝安琪同小肥就反串擔任伴郎同伴娘。

另外係劇集《學警狙擊》演Elanne爸爸嘅苗僑偉都有出席慶賀，令Elanne超開心話：「Super多謝老竇百忙中嚟賀我，太感動啦﹗」

Elanne出道10年，並唔係一帆風順，出道初時遭到好多負面新聞抨擊，亦曾經因為同經理人公司嘅合約糾紛，導致壓力爆煲患上抑鬱症，但依10年可以成功走出嚟，全靠身邊朋友支持，當中就係老公Oscar，患難見真情，原來天使一直喺自己身邊。

事過境遷，Elanne成功走出抑鬱，希望佢同老公展開人生新一頁後，係會越嚟越精彩，越嚟越幸福，再唔會重過之前嘅生活！

Text：Mami Editorial

Photos：Elanne@IG