母乳媽媽最想知7大催乳有效方法

mami熱話家庭關係

By Milky on 21 Dec 2018

Digital Editor

母乳餵哺愈黎愈普及，但無形間媽媽嘅壓力就大左好多。因為奶量唔似得開奶粉咁任君調較，一眾新手母乳媽媽都因為奶量而搞到好頭痕。

母乳媽媽當然係想比最好嘅食物比BB，如果想做到全母乳一定要知以下幾個催乳方法。

1.多食催乳食物

常見嘅催乳食物有魚湯、木瓜、黑豆、豆漿、鮮奶、榴連等等，除左正餐以外，更有催乳茶、催乳曲奇等。但因為每個人嘅反應唔同，所以只要身邊有母乳媽媽試過可行嘅食物，都要盡量嘗試，咁先可以搵到邊樣食物對自己有用。

2.多飲水

以成人計一日正常攝取嘅水量係體重 x 30(單位為ml)，餵母乳嘅媽媽需要額外飲多600ml。因為母乳嘅主要成份係水份，如果媽媽攝取嘅水量不足，身體就會唔夠水份製造乳汁。所以媽媽要多飲水，尤其係出汗後、餵奶前後補充返。

3.多按摩乳房

好多新手母乳媽媽都以為自己奶量少，但好多時候係乳腺阻塞，所以乳汁唔可以順利咁流出黎，而唔係無奶。媽媽平時可以多輕按乳房，由外到內咁慢慢按摩，幫助返疏通乳腺，等乳液可以順利流出。

4.定時餵奶/泵奶

定時餵奶其實對媽媽同BB都有好處，BB可以有定時嘅進食時間，媽媽定時放乳可以維持奶量。如果奶水過多，媽媽會摸到有硬塊、感到刺痛，即係代表乳腺開始塞。就要盡快埋身餵奶或者泵出黎，唔係嘅話好容易會有乳腺炎。而且乳腺炎過後，奶量都會比之前少。當媽媽胸部開始硬的話，代表乳房已經唔夠空間盛載更多嘅奶，乳房就會錯誤以為奶嘅供應過多，就會逐漸減少造奶。所以要定時泵出黎，唔好以為可以儲落下一餐。

5.增加埋身/泵奶次數

當餵完BB無耐又喊，媽媽都會下意識覺得自己奶量唔夠，令到BB食唔飽。但其實比BB不停吸啜，係可以提供一個造奶訊息比大腦。如果媽媽身體真係唔夠奶的話，透過BB吸啜嘅刺激，可以即時令媽媽產生荷爾蒙變化，身體就會製造更多乳汁去供應比BB。所以唔夠奶嘅媽媽，不妨增加埋身嘅次數，又或者喺埋身後繼續泵奶，都可以令大腦知道需要造更多嘅奶。