產後想恢復得好 媽媽可以做呢4件事

媽媽喺生產過後元氣大傷，身體都會變得弱不禁風，加上傷口隱隱作痛、子宮收縮痛、惡露流唔停⋯⋯都會令媽媽感到周身唔自在，想身體更快復原，媽媽喺產後初期都應該盡量做呢4件事。

1. 飲食清淡

啱啱生完BB嘅媽媽腸胃未完全恢復，如果食太多蛋白質食物會加重媽媽嘅腸胃負擔；而油膩、辛辣同刺激性食物都會造成媽媽嘅腸胃不適；亦要記得產後十二朝惡露未清嘅情況下，唔應該食補品住，避免令惡露量增加。

2. 如廁後用清水沖洗會陰

小便後用清水沖洗會陰傷口，可以保持私處衛生，防止細菌感染而影響傷口恢復。

3. 按摩下腹

媽媽喺產後都會摸到下腹有一個球形嘅子宮，想令子宮盡快收縮，媽媽可以按摩子宮，刺激子宮收縮，從而令子宮盡快回復到懷孕前嘅大小，而呢個方法亦可以加速惡露排出。

4. 餵哺母乳

如果媽媽冇時間按摩嘅話，餵哺母乳同樣可以刺激子宮收縮，加速子宮復原嘅進度。

Text: Mami Editorial

Photo Source： Pinterest