BB大得快 好想紀錄低BB每個月嘅成長 5種效果超讚嘅拍攝道具

由陀住BB開始，相信好多媽媽都會每個月為自己個肚影一張相，紀錄低自己喺懷孕過程嘅變化，畢竟呢段日子貶下眼就過，係一段難忘又值得懷念嘅回憶。而當BB出世後，媽媽們更會想將呢段紀錄延續落去，將BB每個月嘅變成一一透過相片紀錄落嚟。想突顯出BB嘅成長轉變，又想將相片拍得唯美／有趣？不妨參考下外國爸媽嘅創意，巧用呢5樣事物吖！

1. 媽媽

初生BB就好似仍然喺媽媽肚入面嘅模樣，媽媽有時或者會諗，抱住BB感覺就好似陀住BB咁，但隨著每個月嘅成長，媽媽抱BB都會開始感到吃力，BB開始變得愈嚟愈重，活動力亦愈嚟愈強，媽媽都唔敢想像如果BB仲喺自己個肚入面嘅畫面！

2. 毛公仔

初生BB對熊公仔並無興趣，但隨著成長，開始對身邊事物充滿好奇，會探索點樣同熊公仔玩，然後熊公仔就變成BB嘅熊麻吉喇！BB亦由本身同熊公仔差唔多大，變成高過熊麻吉，呢個轉變亦會令爸爸媽媽感嘆不已呢！

3. 時鐘

時鐘代表嘅正正係時間流逝，加上有1至12嘅數字，最適合代表著BB喺12個月內嘅變化。

4. BB小床

有啲爸爸媽媽會為BB添置一張小床／睡籃，望著BB由初生起就長時間瞓喺小床內嘅甜睡樣，隨著長大開始縮短睡眠時間，會睜開眼、喺床上腳踢踢、會坐起來⋯⋯都係一種非常反映到BB成長進程嘅方式！

4. 數字氣球

如果爸爸媽媽想相片一目了然，一望張相就知BB係咩月齡，搶眼又童趣嘅數字氣球就非常適合講求整齊又高效率嘅爸爸媽媽！

5.  拍照布

最簡潔嘅方式，就係買一塊啱爸爸媽媽心水嘅靚靚拍照布，上面有1至12嘅數字，當BB到某一個月齡嘅時候，就用道具框框住代表嘅數字，效果都好靚㗎！

Text: Mami Editorial

Photo Source: Pinterest