4個原因話你聽點解BB對住媽媽會特別扭計

相信好多媽媽都好困惑點解人人都話BB乖、聽話又唔扭計，但明明BB對住自己就成個扭計骰咁。

其他人睇住BB嘅時候，BB眼訓就訓、肚餓就食，但自己湊個時，BB扭眼訓但抱極都唔訓、食嘢又扭扭擰擰。最明顯嘅係媽媽一返到屋企，BB先會呱呱嘈、哭鬧。到底點解BB淨係會蝦媽媽架呢？

1.有特別嘅親密關係

媽媽同BB血濃於水，雖然爸爸同BB都一樣，但始終BB係媽媽嘅肚入面住左咁耐，媽媽帶比BB嘅感覺係與眾不同嘅。正因為BB與生俱來同媽媽有呢種微妙、密不可分嘅親密關係，致令BB對媽媽會有特別需要嘅感覺。

2.想引起媽媽注意

BB最愛嘅人當然係媽媽，無時無刻都想有媽媽係身邊。媽媽忙緊嘅時候，BB總係會係隔離喊、扭計、大叫。其實BB都只係缺乏安全感、想癡住媽媽，所以先用各種方法引起媽媽嘅注意，等媽媽可以快啲陪自己。

3.知道媽媽最愛錫BB

雖然大人以為BB仲細，未識得認人。但其實佢地比想像中更叻，爸爸 媽媽 婆婆 對佢地黎講唔只一個名詞咁簡單，佢地係識得分辨嘅。就算係其他屋企人、親戚有幾錫BB都好。BB係自己嘅親生骨肉，始終係媽媽先會打從心底咁愛錫、呵護BB。媽媽就係BB嘅心靈雞湯，BB唔蝦你仲可以蝦邊個喎？

4.測試媽媽嘅底線

因為媽媽就係世界上最愛錫自己嘅人，就算自己點扭計，媽媽可能會有幾句大大聲嚇細路嘅說話，但其實到最後媽媽都會心軟氹返、攬返BB。就因為媽媽點都唔會拋棄自己，所以BB先會放肆步步進逼，一次扭得比一次嚴重，不停挑戰媽媽嘅底線。

Text：Mami Editorial