7個月囝囝毫無先兆胎死腹中爸爸同囝囝作傷痛道別

By race.cheng on 17 Dec 2018

台灣有位爸爸喺網上悲痛貼文，指老婆喺懷孕7個月嘅時候，失去咗囝囝，所以就透過網絡同過世嘅囝囝對話。

爸爸心痛描述當時知道「豬小弟」離開佢哋，內心完全無法接受：「七個月喇，再兩個月你就要出生，亦都係農曆一月一日，大家高高興興要迎接你嘅到來⋯⋯爸比跟媽咪今天例行產檢嘅時候聽到醫生話你無心跳，爸比我當下以為你喺到同我講笑嗎？」

所有事都嚟得太突然，爸爸指囝囝離開前，老婆身體完全無異樣，亦無出血，一啲先兆都無，醫生突然話囝囝已經無心跳，依嗰消息令佢哋兩老婆瞬間崩潰，完全無法接受。

但爸爸始終要接受現實，最後就選擇喺網上同囝囝作道別，叮囑囝囝如果喺天堂見到爺爺，要乖乖哋拖實爺爺：「爸比要同你講，如果我哋有緣，我哋都要做一場父子，仲有就係…喺另一個世界，你要乖乖咁聽爺爺嘅話，爺爺嘅腳有開過刀，要拖好爺爺嘅手唔好亂跑。」

貼文發佈後，有位同樣遇過類似不幸經歷嘅媽媽留言：「自己懷咗九個月嘅小生命，都喺產前兩周突然無心跳，漫長嘅手術非常痛苦，不斷提醒自己絕對唔可以喊，如果喊咗BB會唔捨得走，我唔敢膽抱BB，只係摸佢，怕自己會崩潰大喊，忍著痛看住全世界最靚仔嘅囝囝離開人世，佢會喺菩薩身邊修行，你嘅孩子都會去嗰度好好生活，請節哀。」

有過千位網民亦紛紛留言安慰依位爸爸「希望你哋將身體養好，開開心心咁將豬小弟再生返嚟。」、「多注意媽咪嘅身體同情緒…心裏會好痛！做老公嘅你都要保重，加油」、「我依嗰媽媽，懂！相信，孩子同你哋係有緣分嘅就會再返嚟你哋身邊，宜家先將老婆身體養好，等佢返嚟！加油！」希望「豬小弟」聽到大家嘅說話，如果有緣再到世上揾爸爸媽媽。