孩子開始「每事問」 媽媽們分享難度超高嘅搞笑問題 你又點解決？

孩子大約由兩歲幾開始，會發展出「每事問」嘅精神，咩都要問一餐： 「咩嚟㗎？」、「點解嘅？」一開始爸爸媽媽都會正經咁答，希望用淺白嘅文字解決仔女嘅疑難，但當發現有時候，仔女係明知故問或刻意考起爸爸媽媽，就令爸爸媽媽不勝煩擾、大叫救命！不過有時小朋友問啲問題又真係好笑得嚟又好難答，以下呢啲問題，各位爸爸媽媽又會點答呢？

1.「點解叔叔冇頭髮嘅？」

有網友分享曾帶女兒出街，女兒不停指著光頭嘅叔叔，問媽媽：「點解嘅？」媽媽覺得非常尷尬，唯有一直扮聽唔到。

2. 「點解爸爸下面有腸腸？」

有網友分享一家人曾經一齊沖涼，約兩歲嘅女兒見到爸爸同媽媽嘅身體之後，就問「點解爸爸下面有腸腸？」、「點解媽咪個心口有patpat？」。

3. 「點解耶穌會嚟送外賣？」

有網友分享曾經叫pizza外賣，送上門嘅係一位滿面胡鬚嘅叔叔，仔仔見到就非常驚奇，大聲問媽媽：「媽呀！點解耶穌會嚟送外賣嘅？」

4. 「生肥變咩色？」

有網友分享仔仔見到罐頭有啲位變咗啡色，就問：「點解變咗色嘅？」網友答：「生咗銹咪變色囉！」然後仔仔好認真咁問：「生瘦變啡色？咁生肥變咩色？」

5. 「點解張相冇我?」

有網友分享，仔仔有日睇爸爸媽媽嘅結婚擺酒相，然後喊得好傷心咁問媽媽：「點解張相冇我？你哋點解唔帶埋我去？」

6. 「你做乜收埋兩個橙係呢度啊？」

有網友分享有一次帶兩歲仔仔行超市，喺排隊畀錢嘅時候，仔仔用手指篤媽媽心口話：「媽媽，你做乜收埋兩個橙係呢度啊？快啲拎拿出嚟畀錢啦！」旋即引起周圍嘅人爆笑，連網友老公都笑埋一份，令網友當時尷尬到想搵窿捐。

7. 「佢做乜要食咗個BB？」

有網友分享，曾經同小朋友講大肚婆個肚裡面有個BB，點知小朋友喊住問：「 佢做乜要食左個BB？」

8. 「點解爸爸又同你結婚嘅？」

有網友分享曾經同仔仔講，第日揀老婆要揀啲溫柔、唔發脾氣嘅女仔，點知仔仔問返佢：「咁點解爸爸又同你結婚嘅？」

9. 「邊個生日呀？」

網友分享喺清明節嘅時候一家人去拜察先人，老公點完蠟燭之後，兩歲半嘅女兒天真無邪咁問：「係邊個生日呀？」但大家都冇理佢，之後當大家整金銀衣紙嘅時候，個女就走到啲蠟燭前大聲唱生日歌，然後拍手兼吹熄晒老公好難先點得著嘅蠟燭。

10. 「媽咪做咩著尿片？」

有網友分享，自己正值經期嘅時候，曾帶埋女兒一齊去商場廁所，點知女兒一見到媽媽底褲上有衛生巾，即大叫：「媽咪 ，你做咩著尿片？」網友甚至聽到隔離格笑咗出聲。

雖然小朋友有時啲問題真係問到爸爸媽媽口啞啞，不過有時又真係好好笑，要好好珍惜小朋友會「每事問」嘅時候呀！

Text：Mami Editorial