絕世好爸嘅5個行為 令媽媽自覺冇嫁錯人

世上只有媽媽好，唔通爸爸就唔好？有啲爸爸必須要日以繼夜工作揾錢先可以養活一家人、有啲爸爸寧願放棄工作專心做全職奶爸、有啲爸爸會放工後同媽媽一齊分擔湊仔工作⋯⋯每個爸爸都會有自己獨特嘅育兒方式，為家庭默默付出。不過如果爸爸做到以下呢5位行為，媽媽看在眼裡，都會覺得超暖心，覺得自己果然冇揀錯人（為BB揀咗個好爸爸）！

1. 主動照顧BB

唔洗等媽媽叫，爸爸都會自動自覺湊BB：餵BB飲奶、換片、安撫喊緊嘅BB，將湊BB嘅大小事都攬上身，唔會覺得湊BB係麻煩，或覺得呢啲只係媽媽應份要做嘅事。

2. 分擔家務

家務理應係每個家庭成員都應該要分擔嘅工作（除咗BB），而唔係媽媽獨自嘅工作。

3. 自動添置BB物件

奶粉、尿片、濕紙巾⋯⋯一見到BB基本嘅消耗品就快用完，細心嘅爸爸會順便幫手買返嚟。或當知道天氣會轉冷，會主動為BB買禦寒衣物，而唔會只依賴媽媽一個人去做。

4. 同BB玩

曾經有研究發現，BB同爸爸玩多啲會聰明啲。事實上，好多爸爸的確比起媽媽會同BB玩得更放，氹得BB笑唔停。寵愛BB嘅爸爸會願意放更多時間去親近BB，希望同BB增進感情。

5. 感同身受

見到BB笑會跟住笑，見到BB喊心情都會感到好沉重，事事都會將BB嘅感受放喺第一位，有女兒嘅爸爸更是如此。有時見到媽媽忍唔住鬧BB曳，爸爸更會抱埋BB去一邊安撫，唔捨得BB喊。

爸爸嘅育兒角色或者冇媽媽咁重分量，有時亦唔及媽媽對BB咁細心，但爸爸亦係深愛BB嘅人，如果佢哋願意為BB做呢啲事，已經係一位暖心好爸爸喇！抵讚㗎喇！

Text：Mami Editorial

Photo Source： Pinterest