媽媽餵夜奶覺得沮喪嘅7件事

初生BB缺乏安全感加上6個月前嘅BB平日只靠飲奶，無辦法一覺瞓天光都算係人之常情。

本來餵夜奶並唔係一件難事，但以下事情總會令到媽媽覺得好沮喪。

1.天氣凍

夏天有冷氣涼浸浸又好好瞓，冬天被窩入面又暖笠笠，加上攰左成日，又有邊個願意半夜起身。但BB半夜肚餓不停喊，又點可以忍心唔理佢喎⋯⋯

2.BB戒夜奶嘅願望唔成真

媽媽每日都默默祈求BB今日開始可以唔洗飲夜奶，但每到咁上下時間聽到喊聲，就知道今日嘅願望又唔成真喇！唯有退而求其次，祈求今晚BB淨係起一次身好啦～

3.BB瞓得差

平時飲夜奶BB都算有固定時間，可能係隔3-4個鐘起身一次。但萬一遇著BB瞓得差，可能每半個鐘就醒一次⋯⋯或者BB碌黎碌去好似就醒咁，媽媽又點會安心瞓覺啊～

4.BB一放低就醒

餵飽奶氹BB瞓覺要不停咁抱，因為BB抱住就好好瞓，一放低落床好似有針吉咁喊住起身，一抱返一陣又無事，一放低又再喊～

5.老公嘅睡相

當你捱住眼瞓咁餵緊BB飲奶，轉個頭見到老公熟睡嘅睡相，望住佢張開左少少嘅嘴，個嘴角仲流緊口水，當場真係會怒火中燒，冬天都變夏天。明明大家都有責任照顧BB，但永遠半夜時間BB喊到拆天咁喊足幾分鐘到幾個字，唔知點解老公個耳仔好似失靈咁，可以完全聽唔到！

6.老公嘅鼻鼾聲

想BB一覺瞓天光嘅大前提係要提供一個舒適、寧靜嘅環境比BB瞓覺。餵夜奶嘅媽媽當然都想啦，但每次餵完奶氹BB瞓覺個時，BB準備合埋眼之際，老公又扯鼻鼾，試問BB又點會瞓得著喎！搞到媽媽要無限輪迴咁氹BB，BB又無限輪迴咁比爸爸嘈醒，然後媽媽又無限輪迴咁氹⋯⋯

7.成為極高需求嘅人肉奶咀

餵人奶嘅媽媽通常都會比BB當左係人肉奶咀，半夜就算餵飽左BB，BB一日未瞓得冧都唔會鬆口。見到BB個嘴仔無再啜，以為可以功成身退，但當你一縮開，BB醒左又要喊住繼續啜⋯⋯唔想再重複犯錯，唯有等BB自己鬆口，但永遠都唔會預測到BB幾時先真正訓冧，可能幾分鐘，可能一個鐘，亦可能係斷斷續續咁要啜，真係諗到都覺得痛啊！

Text: Mami Editorial