做囡會好驚 做咗媽媽就唔怕掂嘅3樣嘢

以前做囡個時，可以話係十指不沾陽春水。

自從做左媽媽之後，唔單止係陽春水，連口水、鼻水都要掂。

以前掂到都會喊三聲嘅嘢，但諗都無諗過，原來母愛係會驅使你對佢地有免疫功能？

1.唾液

首先由最小兒科嘅口水講起，BB吽牙仔個時必經不停流口水嘅階段，加上有時BB飲飽奶，打嗝時會連埋奶一齊吐出黎。但而家嘅自己情急起上黎，係唔會再諗住去搵紙巾或者毛巾仔，而係會徒手去接住個一啖口水。

以前嘅自己面對自己以外嘅口水可能好抗拒，掂到都要洗手嘅，而家BB放完手指入口仲會摸下媽媽塊面、頭髮。

以前食嘢都要用公筷、唔食人口水尾，自從做左媽媽，要食埋BB食唔哂嘅嘢食。

2.鼻涕、鼻垢

口水加奶只係第一階段，升級嘅有鼻水同鼻屎。

當BB傷風時流鼻水，突如其來嘅一個乞嚏，如果有準備紙巾固然好，但如果無之餘又唔想BB整污糟其他地方，媽媽同樣係會諗都唔諗咁伸出自己對手。

如果見到BB有鼻屎，都會好不自覺咁伸手幫佢處理，處理到仲會好有成功感添，仲要洗手都只係因為要掂BB先洗。

3.便便

便便係人嘅排泄物，滿滿臭味再加上充滿細菌，十個人有十個人都唔會願意去觸碰佢地。

但要檢查BB嘅健康，就要觀察BB嘅便便。

以前自己去完便便都只會快手沖廁，但估唔到而家為左知道BB健唔健康，竟然會拎住條充滿便便嘅尿片係度研究，唔單止用眼去觀察，仲會聞完又聞，甚至用棉花棒去翻開。

Text: Mami Editorial