BB一見係水就耍手兼擰頭？ 5個方法令BB乖乖飲水

當BB開始出現排便困難，便便硬到令BB屁股受損，咁就可能係BB嘅水分攝取得唔夠。當BB開始加固後，飲奶量會下跌，呢個時候爸爸媽媽需要為BB補充適量水分，令BB體內有充足水分進行各種代謝作用、令腸臟得以順利蠕動。不過偏偏BB唔鍾意飲水，令爸爸媽媽非常頭痛！以下5個方法都可以提升BB對飲水嘅興趣，有需要嘅爸爸媽媽不妨參考一下，搵出最適合BB嘅方法。

1. 令水變得有味道

有啲BB飲慣甜甜嘅奶、果汁、湯水，自然會對淡而無味嘅白開水非常抗拒。一見到水樽入面嘅係水就會出手推開，甚至飲少少就扮咳，令爸爸媽媽冇晒符。雖然健康院唔建議用有甜味嘅水引BB飲，怕會引起蛀牙等問題，甚至會令BB更抗拒飲水。不過，若然BB已出現便秘情況，與其同BB鬥耐性習慣飲白開水，不如先解激便秘問題，喺水中加入1、2片水果令水變得有味道，引起BB飲水嘅興趣，再慢慢減少水果片分量，等BB慢慢適應飲無味嘅水。

2. 買一個BB鍾意嘅水杯

唔少媽媽都表示，當BB遇到一個好鍾意嘅水樽，就會為用水樽而飲水。一開始爸爸媽媽可以畀個水樽BB玩，慢慢引導BB用水樽飲水，但千祈唔好強迫BB去飲水，而係當BB會用水樽飲到1、2啖，就要誇張咁讚賞BB，令BB覺得飲水係一件開心嘅事。

3. 同BB玩飲水遊戲

BB都鍾意模仿大人，爸爸媽媽可以攞兩個有可愛卡通圖案嘅杯出嚟，喺兩個杯各自倒一啲水，媽媽喺BB面前拎起一個杯飲水，然後同BB講乾杯，睇下BB會唔會都有興趣模仿媽媽嘅行為去嘗試。

4. 睇準時機餵BB飲水

通常當BB瞓醒、活動完都會容易感到口渴，呢個時候餵水畀BB飲，BB會較容易接受，就算只餵幾啖，積少成多，不知不覺就會飲咗唔少水。

5. 多鼓勵BB

有冇發現BB都係好鍾意畀大人讚呢？當BB會主動拎起水樽飲，爸爸媽媽不妨多啲鼓勵讚賞BB，令BB更樂意飲水。

Text: Mami Editorial