4個方法令你影到BB靚樣

未生BB之前，手機相簿全部都係自拍照。生左BB之後，手機相簿全部都係BB嘅相。

無時無刻都想留低BB嘅成長瞬間，但事情往往都事與願違，BB永遠都唔合作，一係扭計，一係唔望鏡頭。

如果想影到BB嘅靚樣，就要做好以下四樣功課喇。

1.等BB食飽同精神

自己餓緊或者恰緊眼訓個時心情都唔多好，BB都一樣，正所謂己所不欲勿施於人，所以我地都唔好要求BB餓住仲要對鏡頭笑。

如果想BB乖乖地比啲可愛表情，就要先照顧好BB嘅肚仔同精神喇！

2.玩具、聲音引誘

有攝影師教落要用球型或者有啷啷嘅玩具吸引BB，呢個方法就岩合照時間喇。

如果係爸爸媽媽其中一個揸機的話，BB都比較容易氹同笑。但如果係請其他人例如路人影的話，BB對生面口嘅人係好難會笑架。

如果係街想影家庭合照的話就要隨身準備呢啲道具喇，萬一冇準備的話可以用怪聲引下BB注意，不過就要睇下幫手影相嘅人願唔願意喇⋯⋯

3.前置鏡頭

BB唔識咩係鏡頭，所以佢地唔會聽到話鏡頭就知道要望去邊，但用前置鏡頭的話，BB睇到畫面反而比較好。

雖然佢地都未必知道眼前嘅係自己，但係佢地睇畫面有嘢移動的話就會好似睇電視咁眼金金望住。

如果前置鏡頭影嘅畫面唔夠闊，一定要用到後面鏡頭的話，媽媽可以買一種自拍鏡夾係電話上，同樣可以吸引到BB嘅視線架。

4.使用連拍

即使用哂以上方法，BB嘅集中力只有短短幾秒，BB可能係你唔為意、未㩒到快門個下就望左鏡頭。

所以影BB嘅時候千其唔好一張一張影，因為合意個秒可能就係你影嘅兩張相之間，唔想錯過任何一秒就開連拍模式吧。

Text: Mami Editorial