胎動過多過少都唔得 胎動反映BB嘅健康

孕媽咪一般會係懷孕16-20週開始感受到胎動，即係BB係肚入面嘅自主性運動，例如呼吸、打嗝、踢腳等等。

之所以每次產檢醫生姑娘都會問起BB有冇郁，係因為胎動唔係單純話比媽咪聽BB郁緊，而係一個監測BB健康嘅重要指標。

正常、健康嘅BB係媽咪肚裡面係應該會有適當嘅胎動，所以自感覺到胎動嘅孕媽咪都應該每日記錄底胎動頻率。

孕媽咪可以每日計算一下胎動嘅次數，正常嘅胎動頻率係每小時不少於3次，十二小時內至少30-40次。

如果想準確一啲計算，可以上午、下午、夜晚各抽一小時計算胎動次數，三次加埋乘四就等於十二小時嘅胎動數，若少於20次就有異常嘅可能。

胎動次數比平日過多或過少其實都反映住BB嘅健康同安全。

BB活動力強都會令胎動次數增多，但如果係忽然變得好頻密，再逐漸減少到停止的話，係BB係子宮內缺氧嘅信號。

如果孕媽咪血糖過低、發高燒，或者BB臍帶繞頸、繞足，都有機會令BB缺氧而窒息。

所以孕中後期嘅胎動頻率係好重要，如果孕媽咪發現BB郁少左的話，可能BB係肚入面訓緊覺，但萬一超過4小時以上都毫無動靜就建議孕媽咪去醫院檢查。

Text: Mami Editorial