驗到自己有BB之後 跟住呢5個步驟做 就可以安心等BB出世

當用驗孕棒得知自己懷孕之後，接落嚟應該點做？

1. 到附近診所驗孕拎懷孕證明

去任何一間普通科私家診所，請姑娘安排驗孕，當證實真係有咗BB後，醫生會推算BB出世嘅預產期，同開出懷孕證明畀你。

2. 預約母嬰健康院

有咗懷孕證明之後，準媽媽應儘早致電母嬰健康院進行預約，呢個步驟好重要，因為母嬰健康院會根據你嘅預產期為你安排喺唔同周數做各種免費產前檢查，如懷孕約3個月會進行早期唐氏篩查。

3.預約私家婦產科

雖然母嬰健康院有唐氏綜合症產前測試，但測試係度胎兒頸皮厚度，準確率只有約七至八成，如果爸爸媽媽擔心唔夠準確，亦可以預約私家婦產科醫生進行準確率達九成嘅T21或Nifty測試，另外亦要及早預約喺胎兒20周左右照結構超聲波（呢項母嬰健康院唔包但需要你喺私家照），檢查胎兒係咪一切正常，如發現胎兒有異常，醫生會同準爸爸媽媽商議會否終止懷孕。

4. 聽產前講座

當BB嘅各項檢查都一切順利，準爸爸媽媽可以安心準備迎接BB出世，呢個時候可以留意醫院或坊間常舉辦嘅產前講座，會教導照顧初生嬰兒嘅技巧、媽媽嘅生產準備、同坐月需知等實用知識。

5. 添置BB物品

當BB喺20周照完結構超聲波後，準爸爸媽媽相信都會知道BB嘅性別，係時候買定BB嘅物品！記得要準備好BB床、奶樽、一定數量嘅初生BB衣物、尿片、濕紙巾、清潔棉等，亦唔好忘記媽媽嘅產後需要，如：沖洗瓶、網褲、產後衛生巾等。

Text: Mami Editorial