BB都可以嘆下按摩 教你3招BB按摩法 舒緩肚仔不適

爸爸媽媽想幫BB清宿便、去肚風，舒緩BB因肚仔唔舒服而哭喊嘅問題，除咗可以喺BB嘅飲食上入手外，其實亦平日亦可以透過幫BB按摩肚仔達到更快速嘅效果。按摩BB嘅肚仔，既可以促進腸臟蠕動、有助排便之外，亦可以令BB感到放鬆，係一項非常好嘅親子互動！而家就等小編教大家三招按摩手法啦！

喺同BB按摩之前，爸爸媽媽需要先準備BB按摩油，避免過度摩擦BB肚皮而受皮膚受損；另外亦可以播放一啲柔和嘅音樂，令BB感到放鬆；如果BB已經識得翻身或爬行，亦要準備BB鍾意嘅玩具，以免BB喺按摩中途感到無聊而走咗去。

一切準備好後，先將BB嘅衫揭起，露出肚腩仔，然後將適量按摩油倒入其中一隻手嘅掌心，然後同另一隻手嘅掌心互搓，直到兩隻手掌有溫熱感，就可以開始為BB進行按摩。

第一式：日月法

用一隻手掌以順時針方向喺BB肚上畫圈按摩，而另一隻手就順時針方向喺BB肚臍上方畫半圓。

第二式：「I Love U」手法

用手按喺BB嘅肚子左方，然後由上向下掃，畫出個「I」字；之後將手放喺BB肚嘅右上方，先用手向左掃、再向下掃，畫出一個倒轉嘅「L」； 最後將手放喺BB肚嘅右下方，順序向上、左、下嘅方向掃，畫出一個倒轉嘅「U」字。

第三式：車輪法

喺BB嘅肚臍下方位置，用雙手交替由上向下掃。

Text: Mami Editorial