電話全部都係BB相 4個要捕捉嘅時刻

媽媽們，自從生咗BB之後，打開你部手提電話嘅相簿，你就發現裡面9成9都係BB嘅相，你同老公嘅合照去晒邊呢？雖然喺別人眼中，BB幾張相都差唔多，但媽媽就會發現每張相都有啲唔同，張張都要留呀，仲有4個重要時刻媽媽一定要捕捉！

1. BB嘅第一次

BB嘅所有第一次都非常珍貴，當然唔可以錯過，媽媽不知幾想廿四小時陪住BB，見證佢哋嘅第一次，包括第一次翻身、坐、食糊仔、爬、企、行⋯⋯每個第一次都係BB成長嘅重要標誌。

2. 甜笑開心靚樣

做媽媽梗係想影低BB最可愛最靚嘅一面，除咗自己留念，仲可以同親朋好友分享。一見到BB露出笑容，一定要影低，仲要如果平時BB好cool，佢嘅開心樣就好值得記錄。

3. 另類表情奇怪行為

BB總係有好多表情，有時啲表情整古做怪，好似模仿大人、扮鬼臉⋯⋯雖然未必係靚樣，但喺媽媽心目中一樣咁傻氣可愛。

4. 同父母嘅溫馨互動

除咗BB自己嘅相，見佢同另一半親子時間玩得咁開心，絕對要影低。對BB嚟講，父母就係佢嘅全世界，只有花多啲時間陪佢哋，佢哋已經好滿足，所以唔少得父母同BB一齊嘅溫馨畫面。

Text: Mami Editorial