每個BB總會有一個可愛嘅乳名 最常見嘅5種命名方法

幫BB改名，除咗要諗中英文名之外，有一個名比起中英文名，更會畀爸爸媽媽、親朋戚友常常叫嘅，就係BB嘅乳名！以下5項都係爸爸媽媽慣常幫BB改乳名嘅方法，大家中唔中呢？

1. 中文名最後兩個字或一個字

最簡單嘅改乳名方法，取姓氏以外嘅兩個中文字、或重複最後一個單字，如「小明」或「明明」，方便又易記！

2. 食物

BB白白滑滑又軟綿綿，同好多食物都好相似，所以好多爸爸媽媽都會用食物作為BB嘅乳名，例如：劉愷威同楊冪嘅女兒叫「小糯米」、陳慧琳兒子叫蝦餃仔同小龍包、《爸爸去哪兒》中超受歡迎嘅小泡芙等。

3. 動物

BB同小動物一樣又萌又可愛，兩者同樣暖化唔少大人嘅心，所以改乳名又點少得用動物呢？好多爸爸媽媽都習慣叫BB做「懶豬」可愛得嚟又親切；而曾主演《金雞》嘅吳君如就將女兒叫做「小肥雞」。

4. BB習慣

有啲爸爸媽媽喺BB出世之後，係無心嘅情況下同BB改咗個乳名，因為見到BB某啲習慣行為，叫得多而叫慣咗！例如章子怡嘅女兒叫「小醒醒」，佢就解釋係因為女兒特別愛瞓，成日要叫醒佢飲奶，每次都習慣叫：「寶貝醒醒，該吃奶了！」

5. 寄望

乳名都可以包含父母對BB嘅期望，例如趙薇嘅女兒叫「小四月」，希望女兒好似四月一樣畀大家有美好嘅感覺；陳妍希嘅兒子叫「小星星」，寓意兒子平安喜樂一閃一閃亮晶晶。

Text: Mami Editorial

Photo Source：劉畊宏willliu@微博、趙薇@微博、吳君如@IG、章子怡@IG