有咗BB之後 同老公嘅話題都離唔開BB 講得最多嘅5個主題

媽媽們有冇發覺，自從BB出咗世之後，同另一半嘅話題都開始起咗變化呢？由以前會分享去邊拍拖、食咩好嘢等等，變成而家開口埋口都「BB～BB～」，傾計嘅主題都離唔開以下5項：

1. BB嘅笑料

BB今日學識咗個新動作、做咗某啲曳嘢或搞笑行為？通通都變成兩公婆每日必定會講到嘅事！有時兩公婆未必可以時刻都齊齊喺BB身邊見證住BB嘅每個新突破，但都希望透過言語或相片紀錄話畀另一半知，你個BB真係好可愛呀！

2. BB嘅便便

BB身體健唔健康，好多時都會反映喺BB嘅便便上，如果BB肚屙或便秘，爸爸媽媽都會好緊張，所以成日都會問另一半：「BB今日有冇便便？啲便便係咩樣㗎？」只要一聽到BB排便暢通又正常，爸爸媽媽先會安落晒！

3. 同BB相關新聞

一見到同BB相關嘅新聞，無論係開心嘅日常笑料定係悲傷嘅報導，都會第一時間同老公齊齊分享，一齊笑一齊難過，做咗爸爸媽媽之後，對其他父母／BB都會更有同理心，有切膚之痛嘅感受。

4. 帶BB去邊玩好

做爸爸媽媽，梗係想自己嘅BB開心，成日都會諗放假帶BB去邊度放電好，個腦都會幻想BB見到新奇好玩嘅地點會有幾咁興奮！

5. 買嘢畀BB

無論行街Shopping定係上網睇嘢，間中見到同BB相關嘅產品，都會分享畀另一半睇，問下意見買唔買好！

Text: Mami Editorial