5個母乳媽媽聽到都想喊嘅事

只要有餵過母乳嘅媽媽都知道母乳路又崎嶇又難堅持，可以話係滴滴皆辛苦。

相信對於母乳媽媽黎講，呢幾件事應該都幾聞風喪膽，唔知各位同路人有冇遇過？

1.倒瀉奶

不論係泵緊、泵完定係坐返熱嘅時候，如果唔小心自己/比其他人倒瀉奶，個刻個心好似比人割左忽咁！

當你好氣餒咁同人講，仲要無人明，你只可以死死氣咁鼓勵自己下轉會多返補返數，默默諗住：奶瀉奶還在。

2.無帶奶泵返工/出街

泵奶呢家嘢真係食藥都冇咁準時，遲左可能會谷到痛、塞乳腺。所以行開行埋或者返工，一定要帶奶泵方便定時定候泵。

但當你夠鐘開泵，先發現無帶泵！奶泵又唔似得充電器咁，十個人起碼有三個人有，到時你想借一個返黎都難！

大家出門前一定要check清楚有冇帶漏任何配件啊。

3.奶袋穿左

奶袋係泵媽嘅左右手，當你滿心歡喜將啲奶倒完入奶袋，發現奶袋穿左或者袋口拉鍊壞左。

萬一又無後備奶袋係手，真係揦手唔成勢！搵得個乾淨嘅樽黎，都唔知袋奶漏左幾多。

4.飲唔哂要倒

媽媽奶有多固然好，若然係窮媽媽，每日奶量只係岩岩好，萬一遇正BB唔賞面飲唔哂或者坐完奶BB訓左，啲奶又留唔到等BB起身，只可以忍心倒左佢。

搞到次次都要早少少坐定奶，但又要計住一個鐘頭內飲哂，媽媽心好累啊！

5.屋企停電

富媽媽聽到都怕嘅，就係屋企停電。難得儲到冰箱有冰奶，雖然唔一定用到，但如果遇到停電，仲要唔知停幾耐，媽媽最擔心緊係啲冰奶會唔會溶。

不過有經驗媽媽話萬一真係停電，千其唔好開個冰箱啊，大概都可以堅持到幾個鐘架！

Text: Mami Editorial