爸爸感受總被忽略 新手爸爸嘅4句心底話

BB嘅出現為家庭帶來好大轉變，除咗新手媽媽要適應，新手爸爸一樣要。不過，大家好多時都會將焦點擺喺BB或媽媽度，冇咁留意爸爸嘅情況，其實新手爸爸都好需要支持同鼓勵，佢哋嘅心底話你又知道幾多？

1. 要返工又要照顧BB同太太，我都好攰

香港爸爸得幾日侍產假，接完BB返屋企，未有時間適應就要進入湊B生活。同時太太坐緊月，爸爸要包容媽媽嘅壞情緒，盡可能減輕佢嘅勞累，等佢可以休息多啲。過幾日爸爸又要返工，放工返到屋企要照顧BB同太太，長期唔夠瞓，返工有時瞌眼瞓都唔奇，真係前所未有咁攰。

2. 唔係性別歧視，但湊BB唔係我專長

爸爸始終冇媽媽咁細心，對於BB日常嘅大小事務，餵奶、換片、幫BB沖涼⋯⋯爸爸都會努力做好，但始終男人粗手粗腳，做起上嚟冇媽媽咁乾淨利落，好似BB poo poo換片，總係有啲位抹得唔乾淨。

3. 我都係新手，可唔可以包容我

大家好多時遺忘咗爸爸都係新手，而不其然認為佢已經進入湊B狀態，咩都上手。事實上，爸爸都係學緊點湊BB，唔好要求佢好熟手，有時做得唔好身邊人唔好太多指責，例如沖奶太熱太凍，畀多啲機會爸爸去進步。

4. 我冇媽媽嘅母性，但我會做好爸爸嘅角色

媽媽對BB嚟講有一種先天嘅吸引力，BB一聞到媽媽嘅氣味、聽到媽媽把聲就會好安心，所以媽媽總係可以安撫到BB，氹到BB瞓覺。爸爸雖然冇先天優勢，但佢願意靠後天努力，同BB建立親密關係，做媽媽嘅後援隨時候命，盡力做一個好爸爸。

Text: Mami Editorial