以為幫BB準備好 到頭來事與願違嘅4件事

有時有啲嘢冇得強求，好似媽媽幫BB打點咗好多嘢，都要天時地利人和配合先可以順利完成，唔會浪費媽媽嘅一片苦心。以下4件事係咪似曾相識？你家BB總會發生好幾次！

1. 著靚靚先爆片

媽媽幫BB著到靚一靚準備出街，BB唔知點解就會喺呢個時候爆片，爆到成身都係，要快手快腳幫佢清理。仲要總係出門前先嚟爆片，趕頭趕命幫BB換過件衫出街，至於件靚衫分分鐘就咁報銷。

2. 換完片就便便

當媽媽幫BB換完片，BB乾乾淨淨舒服晒之際，轉頭BB即刻poo poo，換片模式重新啟動，再換多一次！聽好多媽媽講，佢哋嘅BB都好鐘意換咗片先poo poo，唔通舒服啲？

3. 佈置好唔肯影相

每逢過時過節或BB生日，媽媽都會將屋企佈置一下，增加節日氣氛。等佈置好之後媽媽想同BB影張相留念，但BB好多時都扭計唔肯影相，浪費咗個咁靚嘅佈置，張相少咗BB邊有意思。

4. 到玩時就瞓著

安排咗活動畀BB或帶佢去主題樂園，諗住BB去到一定好開心，點知一到目的地BB先嚟瞓著，到佢起身可能活動已經完咗。雖然有啲掃興，但叫做帶BB到此一遊。

Text: Mami Editorial