BB大左要轉2號奶粉 究竟轉好唔轉好

眼見BB踏入6個月階段，唔少爸爸媽媽都有個疑惑係唔係要幫BB轉2號奶粉呢？

雖然2號奶粉罐上的而且確寫住適合6個月以上飲用，但其實係唔係踏入6個月就需要立即轉？
爸爸媽媽可以根據以下幾個因素去衡量自己嘅BB係唔係需要轉2號奶粉。

由於初生BB身體機能發展未成熟，冇辦法消化過多嘅營養，所以1號奶粉嘅成份將營養比例控制係適合初生BB消化嘅程度。
而2號奶粉添加的營養如蛋白質、礦物質同乳糖等，成份較為適合活動量大、身體機能發展較成熟的BB去消化。

2號奶粉標榜適合6個月以上BB，雖然營養較1號奶粉多，但如果BB身體未適合或者未能消化，會容易造成BB腸道難以吸引營養。
奶粉中嘅棕櫚酸脂會同鈣質結合形成脂肪酸皂，唔單止會令BB吸收唔到鈣，仲會令BB便便偏硬。
過多營養會增加BB腎臟負荷，可能會引致BB便秘、腸胃不適等情況。

由於BB 6個月以上可以開始加固，即使2號奶粉營養較高，但就算BB仲係飲緊1號奶粉，亦可以從固體食物方面入手，平衡返不足夠嘅營養。
除非BB已經加固一段時間，仍然唔理想或生長線長期偏低，就可以考慮轉飲營養較高嘅2號奶粉。
2號奶粉一般較甜、有不同口味，如BB持續出現厭奶情況，亦可嘗試轉。

而衛生署亦指明如BB已開始加固，可繼續飲用配方奶(1號奶粉)。
所以無規定話6個月就要轉奶粉，爸爸媽媽亦唔需要操之過急，可慢慢觀察BB到底有冇需要轉先決定。

Text: Mami Editorial