趁BB未出世前 要大做特做嘅4件事

孕媽媽未卸貨前要把握機會，享受私人時間，BB出世後忙到冇時停，唔知幾時先有時間做，而且有啲事生咗BB之後就會離你好遠。各位孕媽媽，趁BB來臨前一定要做以下4件事，如果唔係你會後悔！

1. 瞓到自然醒

BB一出現，你唔使旨意有覺好瞓，而且湊初生BB好攰，半夜兩三個鐘就要起身餵奶、換片，唔可能連續瞓到幾個鐘。趁依家要瞓多啲瞓到夠為止，仲要畀自己瞓到自然醒，因為隨住做咗媽媽好難可以瞓到自然醒。

2. 行街行夠本

湊BB周身唔得閒，你唔會有時間好悠閒咁行街，變成網購或有目標咁去購物，買完需要嘅物品就要趕住返去湊BB，呢種行街唔叫得享受，依家就畀自己漫無目的咁行街。

3. 同老公二人世界

即將由二人行變成加埋BB嘅三人行，遲啲忙住湊BB，你同老公拍拖嘅機會同時間都會少咗好多。未三人行前，爭取時間同老公拍拖行街、睇戲、食飯，享受吓寧靜嘅二人世界。

4. 優雅地食餐好

想像一下有咗BB之後，你好難安安落落食餐飯，唔係要抱住BB食，就要三扒兩撥食完飯，怕BB好快起身，或趕住做其他家務。想好Lady咁食飯？難上加難喇！

Text: Mami Editorial