當BB加固後 一餐都可以餵成個鐘 全因BB呢5個淘氣行為

BB到4至6個月開始進入加固期，媽媽除咗每日要苦惱買咩食材畀BB試之外，喺餵BB食米糊／粥嘅時候都要格外打醒12分精神，同BB鬥智鬥力，務求係食物放涼之前餵BB食晒，皆因BB喺食食下隨時會做以下5個行為，令媽媽好笑又無奈。

1. 搶匙羹

見到媽媽用匙羹餵自己，BB都會好好奇，甚至想搶埋黎研究下，於是媽媽就要同BB互搶匙羹，就算將手上匙羹畀BB玩，自己拎過第二隻都好，BB都會想一併搶埋！

2. 周圍望

BB對任何聲音都好敏感，一聽到有其他人傾計或外來聲音，都會好奇望向聲音嘅方向，完全分晒心唔想食嘢，時不時左擰右擰，而當媽媽叫BB食嘢嗰陣，BB就好似完全聽唔到咁唔理自己，令媽媽大感無奈！

3. 扭抱

BB食食下嘢忽然扭媽媽抱，望住仲有大半碗米糊／粥，同BB成面都係食物殘渣，真係抱唔落⋯⋯唯有不停拎玩具引BB乖乖食埋落去。

4. 周圍指要媽媽拎嘢畀自己

當BB到10至11個月大左右，會開始識手指指，指著某件物品要求媽媽拎畀自己，一餐粥嘅時間可以不停周圍指，令媽媽疲於奔命到處拎嘢畀BB，一唔拎BB就會發脾氣唔肯繼續食。

5.不停扔嘢落地

無論BB手上拎著啲咩都好，都會不停扔落地下，再要求媽媽執返畀自己，一餐粥要媽媽不停執幾百次⋯⋯

Text: Mami Editorial