外國流行BB觸覺板太強大喇！屋企有多餘嘅用品？通通變成BB嘅玩具

當BB 6個月大開始，手部嘅運用愈嚟愈靈活，開始會拎身邊嘅物件把玩，如：濕紙巾蓋、計數機、衣夾等等，都足以令BB玩個不亦樂乎。近年喺歐美就非常流行由爸爸媽媽喺屋企搵各式各樣物品組合成一個「觸覺板」(busy board)，任BB點玩都得！除咗令BB無顧忌咁大玩特玩之外，仲可以刺激BB嘅大腦、感官同觸覺發展，令小肌肉得到鍛煉，好處多不勝數！一齊睇下外國爸媽嘅製成品有幾強大啦！

簡簡單單，喺唔同嘅圓板貼上唔同質感嘅物料，令BB感受到唔同嘅觸感，已經令BB覺得非常新奇！

想有更多玩法嘅話，色彩鮮豔嘅繩、扣、鎖鏈都相當吸引BB去玩！BB仲可以篤下計數機、揭下書仔、拉開鞋嘅魔術貼，訓練BB更靈活運用手部。

可以轉轉齒輪，將算盤嘅珠仔推嚟推去，小小天地足以令BB玩上半日！

連發光都有，小編都不禁讚嘆爸爸嘅專業！不過將唔同門鎖都放上去，爸爸你肯定要訓練BB嘅開鎖技術？

照鏡認識下自己個樣，玩下磁石貼都係唔錯嘅選擇！

對美有高要求嘅爸爸媽媽，甚至可以為BB嘅觸覺板襯好色調，變成屋企內一個靚擺設。

一個觸覺板上有各種日常居家常見用品，除咗為BB帶嚟驚喜同新奇感外，仲可以令BB早日接觸家居常見事物。睇完咁多外國父母嘅設計，爸爸媽媽係咪都蠢蠢欲動為BB整返一個專屬嘅觸覺板呢？

Text: Mami Editorial

Photo Source: Pinterest