做父母前要先考牌 你接受到以下4件事？

好多人都話做父母要考牌，唔係個個都符合做父母嘅條件，當然冇人天生識做父母，要慢慢適應呢個角色。如果你準備懷孕、正在懷孕，可以睇吓你同另一半接唔接受到以下4件事？冇問題的話，你點都會係一個合格父母。

1. 永無止境嘅體能挑戰

湊初生BB冇覺好瞓就一定，喺唔夠瞓冇精神嘅狀態下，要繼續湊BB嘅日常生活，餵奶、換片、幫BB沖涼、氹瞓覺。BB大啲就開始陪玩，佢哋精力無限，會玩到你冇電，由依家開始你要有心理準備，接受一連串嘅體能訓練。

2. 付出無限耐性與愛

BB可以無緣無故扭計、大喊大叫、唔肯瞓，對住佢唔同嘅情緒，你要付出更多嘅耐性去包容，畀更多愛去氹佢。如果你唔係一個有耐性嘅人，BB好快會令你變得有耐性。

3. 願意犧牲私人時間

BB嘅出現會令你嘅世界出現翻天覆地嘅轉變，你嘅生活圍繞住BB，要花更多時間照顧佢。親子時間多咗，你嘅私人時間必然少咗，唔好妄想你可以好似以前咁自由自在。

4. 將錢使喺BB身上

以前你可以無顧忌咁使錢，依家你要捨得使錢喺BB身上，除咗奶粉、尿片等日用品，仲有之後上playgroup、幼稚園嘅費用。如果你只想維持自己嘅生活水平，而唔想用喺BB身上，你要諗清楚係咪適合做人父母。

Text: Mami Editorial