BB反應愈來愈多 同BB互動必做嘅6件事

隨住BB愈來愈大，佢哋嘅反應愈來愈多，爸爸媽媽同BB嘅互動亦都多咗。BB眼中只有父母，只要多啲陪BB玩，畀佢知道爸爸媽媽好錫佢，BB就會好開心。以下6個舉動你同BB做過未？

1. 望住BB 

同BB嘅眼神接觸好重要，BB由出世就對世界充滿好奇，先用眼睛去探索世界，望吓佢最熟悉嘅父母。當爸爸媽媽好溫柔咁望住BB，BB都會一樣望到實，感受到父母嘅愛。

2. 同BB傾計

雖然BB仲未識講嘢，但爸爸媽媽可以同佢傾計講嘢，佢會用笑容或咿咿呀呀嘅BB話回應你，又可以等佢聽多啲父母把聲。

3. 輕撫BB身體

同BB多啲身體接觸，可以令佢感受到同父母嘅親密。爸爸媽媽可以輕輕摸吓BB個頭、面仔、手腳，畀佢感覺到父母體溫嘅溫暖。

4. 攬住BB

BB好鍾意畀爸爸媽媽抱住攬住，總之可以黐住爸爸媽媽就滿足。攬住BB會令佢好有安全感，佢亦會好自然咁伏喺父母身上。

5. 錫BB面仔

輕輕錫吓BB面仔係親子溫馨嘅表現，但要留意唔好錫BB嘴仔，因為好容易將病毒傳畀BB，後果可大可小。輕輕錫面就好，BB皮膚嬌嫩，免得令佢皮膚敏感。

6. 引BB笑

能夠令BB笑到咔咔聲，唔止BB開心，爸爸媽媽都好有滿足感，同BB玩peekaboo包保佢實笑得出。

Text: Mami Editorial