事事以BB為先 新手媽媽最擔心BB嘅4件事

新手媽媽湊BB有好多疑問，BB每件事媽媽都好上心，又因為唔熟手，即使BB出現一啲小問題，媽媽已經好擔心。新手媽媽最擔心BB咩事？可能包括以下4件事。

1. 夠唔夠飽

無論係餵人奶定奶粉，媽媽都怕BB食唔飽。人奶媽媽會擔心自己嘅奶量唔知夠唔夠應付BB嘅需要，唔夠就要追奶，有啲BB食得少，追唔到健康院嘅指標，又怕佢哋食唔夠增磅唔理想。

2. 瞓得好唔好

初生BB要瞓好多，每隔兩三個鐘食完奶又再瞓，最怕BB瞓得唔好，不斷喊又唔知佢發生咩事。到BB大個少少，就算戒咗夜奶，都未必可以一覺瞓到天光，BB瞓得唔好對佢哋發展都有影響。

3. 大小便係咪正常

初生BB食奶情況可以反映喺佢哋嘅大小便上，夠多濕片即係佢哋飲奶夠。BB有時幾日甚至成個星期都無大便，媽媽好擔心要唔要帶BB睇醫生，會唔會肚仔痛？對BB食慾有冇影響？

4. 有冇唔舒服

如果BB唔舒服，傷風、感冒、發燒⋯⋯媽媽一定好緊張，尤其發燒要點做好？幾時要睇醫生？媽媽留意住BB嘅體溫喺40度徘徊，媽媽嘅心情都跟住七上八下。

Text: Mami Editorial