爸媽平日細心聆聽小朋友嘅說話，可以令小朋友樂意聽講同埋合作。

溝通可以係一門學問，亦可以係一門藝術，想同小朋友好好溝通，不如了解吓以下四項，爸媽可以喺日常生活裡面試下運用呀。

1. 少說「不」

唔可以亂跑，唔可以無禮貌，……，聽落好似樣樣都唔可以做。如果一直用「唔可以」，一嚟小朋友會習以為常，二嚟會覺得樣樣事情都受束搏，時間耐左，就可能唔理照做，直到爸媽大聲喝止先有效。

除非係危險情況，小朋友會傷害到自己或者其他人時，要清楚講比佢地知唔可以咁做。而其他時間，都可以運用技巧將「唔可以」變成「可以」。例如：「唔可以搶其他人玩具！」可以變成「先要問吓對方，對方同意先拎」、「唔好怕醜唔出聲啦。」可以變成「你見到姨姨要打招呼，做個有禮貌嘅小朋友，做得到嗎？」。

改變一下說話嘅方式，避免成日講「唔好」，喊少同小朋友之間嘅衝突，又可以畀小朋友清楚知道可以點做，係個有利而無害嘅好方法。

2. 畀小朋友選擇嘅機會

係適當而且有限嘅範圍內，多啲比小朋友自己選擇嘅機會。一方面可以訓練佢地嘅思考能力，另一方面，佢地會因為有選擇嘅權利而開心，亦由於係佢地自己揀嘅，成件事都會合作同順利好多。

3. 多專心聆聽

講緊嘅係專心聆聽，放低所有嘢，有眼神接觸嘅聆聽同對話時間。只有專心聆聽，小朋友先會感覺受重視同支持，無論係開心定係傷心事，都會盡情咁同爸媽傾。呢一種良好嘅溝通帶畀佢地嘅滿足感，亦都係下一次，甚至係將來佢願以同你分享心事同埋軼事嘅主要因素。

4. 接納小朋友嘅諗法同感受

除左耐心聆聽，要緊記唔好批評或者否定小朋友嘅感受，太多嘅批評同否定只會令小朋友唔想講。嘗試吓了解佢地嘅感受，接納佢地嘅諗法。亦都唔需要太早比意見，有時候，佢地自己講完件事，好快就會講埋諗到嘅解決辦法。

即使係一啲唔好嘅諗法，可以用引導方式去提醒佢地諗吓有無其他更好嘅辦法，唔需要即刻同佢地訓話㗎。

溝通嘅時候最重要係令小朋友覺得爸媽同佢地係同一陣線呀！

Text: Mami Editorial