湊大爸媽嘅爺爺嫲嫲同公公婆婆，湊B嘅方法同態度，好多時同爸媽唔一樣。

有爺爺嫲嫲、或者公公婆婆幫手湊BB嘅爸媽，應該都一定同佢地發生過有關湊B嘅衝突，係好正常嘅事。因為兩代之間一定有啲諗法同做法唔同，其實大家都係為左想BB開心健康成長。就算有唔同嘅諗法 ，只要多啲溝通，總可以搵到一個大家都滿意又開心嘅方法。

1. 長輩靠經驗，爸媽信資訊

長輩通常都相信自己嗰套多一啲，因為係佢地嘅親身經驗。而爸媽就會相信佢地得到嘅資訊多啲，尤其係嚟自可靠嘅來源，例如，醫生、醫院、健康院等等。因為兩代都好肯定自己嗰套係唔會錯嘅，所以好容易發生衝突。

其實，有時需要變通吓，個個BB都唔同，適合佢地嘅嘢都會有啲唔同。長輩講嘅，有時可能因為時代唔同已經唔同咗，而爸媽嗰套，有時都可能要因應情況而定，唔可以一成不變。

2. 長輩有時過份遷就孫仔孫女

大家可能都聽過呢句說話：「仔係要嚟教，孫係要嚟縱」。可能事實無咁嚴重，但好多老人家見孫仔孫女咁可愛，本身已經好鍾意好錫佢地，加上諗起自己嘅仔囡咁細個嗰時嘅模樣，就好容易心軟。

爺爺嫲嫲同公公婆婆心裡面可能就會諗，教仔囡係父母嘅責任，錫孫仔孫女先係佢地嘅責任。所以好多長輩都好少拒絕孫仔孫女嘅要求，慢慢就好容易變成比較縱容佢地。

3. 長輩相對鍾意幾時都抱實BB

當BB無喊嘅時候，究竟好唔好成日抱住佢地呢，我諗爺爺嫲嫲同公公婆婆多數會一邊抱住BB，一邊同BB講：「唔可以成日抱㗎～抱多一陣就要放番你落床仔㗎喇。」。

Text: Mami Editorial