懷孕幾個月都未見肚 出街都冇人知係孕婦 孕媽媽肚圍取決於5個因素

「明明有咗7個月都唔係好見肚，出街都冇人發現到自己係一個孕媽媽！」、「 其他同樣周數嘅孕媽媽個肚都咁大，點解我個肚咁細？」 孕媽媽喺懷孕之後，都會好期待自己個肚一日一日咁變大，一旦發現其他差唔多周數嘅孕媽媽個肚比自己嘅大，就會擔心係咪自己嘅BB發育得唔理想。其實，孕媽媽嘅肚圍會受到以下5個因素影響，即使肚圍較細，BB都一樣可以係健康活潑！

1.孕媽媽身材

如果孕媽媽本身比較豐滿，腹部脂肪多，肚圍當然會比纖瘦嘅孕媽媽大！

2.胎兒數目
孕媽媽懷有雙胞胎以上嘅肚圍一般較大，有啲雙胞胎孕媽媽喺懷孕5個月時，個肚已經同就快臨產嘅單胎媽媽一樣大！

3.羊水
胎兒喺肚內會被羊水包圍，有啲孕媽媽嘅羊水較多，肚圍尺寸就會大啲；相反如果羊水較少，肚圍尺寸就會細啲，只要羊水值都喺正常範圍內，胎兒就會發育得好好，媽媽唔駛擔心。

4. 骨盆

如果孕媽媽嘅骨盆較寬闊，肚就會睇落冇咁大；但如果骨盆較狹窄，肚就會向前突，所以睇落會較大。

5.胎盤位置

胎盤位置有分為前壁同後壁，一般胎盤喺後壁位置嘅時候，肚圍尺寸會細啲，相反喺前壁位置嘅話，肚圍尺寸就會大啲。

Text: Mami Editorial

Photo Source： Pinterest