三大快餐店推「走塑」食客響應可得印花換熱飲/環保餐具

三大快餐店：美心、大快活同大家樂齊齊合作推出「走塑」環保活動，今次比上次「走飲管」活動更大規模，市民只要喺叫外賣時「走塑」，就可以獲印花，集齊6個印花就可以換熱飲或者環保餐具。

繼「走飲管」後，今次嘅外賣「走塑」活動預計會喺本月中開始，大家可以喺叫外賣嘅時候主動走塑，自備餐具，為環保出一分力！

計劃係政府聯同三大快餐店合作推出，希望減少市民外賣時用塑膠餐具嘅情況；宜家快餐店都會幫外賣食客提供即棄塑膠餐具，估計每月會用超過5百萬套嘅塑膠餐具。立法會議員張宇人指，如果今次反應好，政府會撥款推出更多環保措施。

強颱風「山竹」襲港後，有大量塑膠垃圾沖到岸上，有市民自發清理垃圾嗰陣，仲發現20年前嘅膠袋，睇得出啲膠真係好「長命」！其實世界各地已經不斷開始棄用塑膠，法國政府已立例，係2020年起將全面棄用塑膠餐具；而台灣明年起禁止公營部門、公私立學校、百貨公司和購物中心、連鎖速食店等提供膠飲管，並會係2030年全面禁止使用塑膠製品，齊齊為環保出一分力！

Text：Mami Editorial

Photos：Printerest