想BB快高長大但又唔想咁快大 媽媽們有呢6個矛盾心情嗎？

喺照顧BB嘅唔同階段，媽媽少不免會有唔同嘅期望，例如照顧初生BB時，會希望BB快啲大、快啲戒夜奶、快啲學識抬頭⋯⋯但當BB真係過咗呢個階段，媽媽又會懷念啱啱出世，對世界一無所知嘅初生BB，亦開始慢慢唔捨得BB大得咁快。喺育兒嘅路上，媽媽總會充滿各種矛盾嘅心情，大家又有冇曾經有過以下呢6種諗法呢？

1. 想BB快啲大但又唔想大得咁快

照顧初生BB幾乎令媽媽冇得休息，而脆弱嘅頸椎亦會令媽媽好擔心BB會隨時受傷，所以會好希望BB快啲長大、戒夜奶、戒百日哭、學識抬頭⋯⋯但當BB慢慢長大、順利度過初生階段嗰陣，媽媽一方面會暗暗慶幸終於度過最艱辛嘅時刻，但另一方面又唔想BB大得太快，一諗到BB大個咗就會甩開媽媽嘅手就會好悲傷，好想BB一直停留喺依賴住媽媽嘅階段。

2. 明知要放手畀BB嘗試但又怕BB受傷

當BB學識爬之後，會對世界充滿好奇而周圍探索，媽媽一方面欣慰BB變得肌肉變得有力，但另一面又好擔心BB對手摸到污糟地板或物件後放入口而生病，或爬行時會周圍撞到硬物而受傷，所以媽媽經常好糾結究竟畀唔畀BB周圍爬好。

3. 想離開BB一陣又會擔心其他人湊唔掂BB

媽媽全天候照顧BB，冇晒個人興趣同娛樂，每日累積嘅辛勞令媽媽感到疲倦同非常大壓力，有時都想放低BB一陣，自己出去唞唞氣、放鬆一下。但一諗到將BB暫時交畀其他人照顧，又會覺得好唔放心。

4. 想時刻抱抱BB但又怕抱得多會更扭抱

好多媽媽一聽到BB喊都會好想立即安撫BB，唔忍心BB喊落去，但聽到身邊好多人都話抱得BB多會令BB習慣而更扭抱，令媽媽感到非常為難。

5. 想BB鍾意自己多啲但又怕會太黐身

十月懷胎生BB出嚟，媽媽比任何人對BB嘅感受更深，當然希望同BB有更多相處時間，BB又會鍾意自己多啲！不過媽媽又會擔心BB會特別黐自己，而令自己分身不暇做家務或處理其他事情。

6. 想放棄餵母乳但又唔捨得BB飲母乳嘅親密感覺

餵母乳容易令媽媽因長期擠奶而手痛、因乳腺阻塞而乳房痛、因BB吸吮方式不當而乳頭痛⋯⋯各種痛楚都會令母乳媽媽萌生放棄嘅念頭，但每當想放棄嗰陣，一見到BB飲母乳好舒服嘅樣，又會再激發起媽媽繼續餵母乳嘅諗法。

Text: Mami Editorial

Photo Source： Pinterest