咪以為BB咩都冇所謂 對BB做呢5件事 分分鐘令BB發脾氣

爸爸媽媽有冇發現，BB會特別討厭某幾個行為，當爸爸媽媽一做／想做嘅時候就會非常唔合作，仲會嬲嬲豬咁發晒脾氣呢？以下5個係常見嘅BB討厭事件，大家嘅BB又係咪咁呢？

1.抹嘴

當BB食飽飽之後，嘴邊通常都會沾到食物，媽媽自然都希望幫BB抹乾淨，將BB變返做乾淨寶寶！但BB通常都會好抗拒呢個動作，當濕紙巾一掂到BB嘅嘴邊，BB就會即刻邊叫邊扭嚟扭去，令媽媽唔忍心再抹落去⋯⋯

2.掰開嘴

當BB出牙仔，爸爸媽媽當然好想「欣賞」下牙仔有幾大粒啦！但係BB就非常唔鍾意畀爸爸媽媽掰開嘴仔嘅動作，會將嘴仔合得更實！唔畀你睇！

3.洗頭

當媽媽橫抱BB洗頭嗰陣，BB都會喊到大大聲，直到個頭洗完為止。

4.搶走手上嘅嘢

BB對好多事物都好好奇，一拎到手自然要好好研究下，不過唔係所有嘢都啱BB玩，所以為BB安全著想，爸爸媽媽都會搶走BB手上嘅嘢。但對BB嚟講，好唔容易先到手嘅嘢畀人搶走咗，自然會唔開心到喊出嚟！

5.要BB瞓覺

BB眼瞓自己瞓著就得，但明明好精神仲想玩多陣嘅時候就畀爸爸媽媽強行哄瞓，自然唔會輕易妥協而不停掙扎，仲會對爸爸媽媽發脾氣！

Text: Mami Editorial