探訪初生BB都要有禮貌 探訪者應遵守10個規則

BB出世係一件值得慶賀嘅事，好多親朋戚友都會想第一時間親身到賀，為呢位初來乍到嘅新生命送上祝福。不過，新生BB非常脆弱，而正值坐月嘅媽媽身體虛弱，加上產後情緒不穩，探訪者應該注意以下呢10件事，以免引起媽媽嘅不快。

1.探訪前先詢問

首先，想睇BB前應該先徵求媽媽嘅同意，因為生完BB最虛弱又最忙碌嘅係媽媽，媽媽喺唔夠休息嘅情況下，無論外貌、精神同心理素質都係好差，未必想喺呢個時候見到客人，亦未必有心理準備去招待客人，所以探訪時應先問問媽媽嘅意願。

2.探訪時間唔好太長

初生BB嘅飲奶次數頻密，餵母乳嘅媽媽需要配合BB嘅時間表而隨時走開。喺媽媽嘅角度，BB嘅作息時間表係最重要，亦唔會願意打亂BB嘅作息時間表，所以探訪者去拜訪前要應先問媽媽邊個時段會較為方便，如無必要就唔好留太久，見時間差唔多就最好自動離開，畀媽媽多啲時間專心湊BB。

3.有傷風感冒症狀唔好探訪

初生BB嘅抵抗力較弱，好易受感染而病，而且容易引起嚴重併發症，所以就算只有輕微病徵，都唔應該前往探訪BB。

4. 自動自覺洗手

如上，大家要抱或觸摸BB前，都應該先徹底清潔雙手同消毒，而唔好只等媽媽提醒。

5.手機轉靜音模式
初生BB對外界聲音好敏感，突如其來嘅響聲都足以將熟睡中嘅BB嚇醒，令媽媽重新哄BB瞓，所以為照顧初生BB同媽媽嘅感受，喺探訪過程中請將手機鈴聲暫時改為靜音模式。

6.唔好噴香水

香水始終充滿化學成分，BB可能會對於刺激性嘅化學氣味感到唔舒服。

7.唔好親吻或隨便抱起BB

大人嘅口水含有好多細菌同病毒，如果親吻BB會將細菌同病毒傳畀BB，而令BB病！另外，初生BB嘅肌肉同骨骼未發育好，錯誤嘅抱姿易令BB受傷。所以尊重父母，愛護BB，請唔好親吻BB，喺抱BB前亦要先徵求爸爸媽媽同意，請爸爸媽媽指導正確嘅抱BB方法。

8.正面鼓勵爸爸媽媽
新手媽咪又要餵奶，又要幫BB把屎把尿、沖涼、哄瞓覺等，尤其是餵母乳嘅媽媽會更加忙，疲憊令新手媽媽嘅情緒低落，所以探訪者喺講到媽媽嘅近況時，應該給予正面積極嘅鼓勵，而唔好講啲雪上加霜嘅說話令媽媽心情更難過。

9.唔好帶小朋友去

小朋友總係好難預測到下一步嘅行動，所以為免令新手媽媽同初生BB帶嚟干擾同麻煩，最好唔好帶小朋友去。

10.唔好亂畀意見

如果妳已經經歷過呢一切，好想將自己嘅經歷同呢位新媽媽分享，請忍忍吧！因為你嘅呢啲經歷可能會為新媽媽帶嚟更大嘅壓力同擔憂，請喺新媽媽經歷完呢一切，或主動提出疑問嗰陣先再給予建議。

Text: Mami Editorial