老公湊B幫倒忙 令媽媽激氣嘅6件事

媽媽湊BB周身唔得閒，如果老公幫到手，可以減輕媽媽唔少負擔同壓力，可惜呢個世界神隊友可遇不可求，豬隊友卻一大堆。你身邊嘅豬隊友另一半有冇做過以下激氣事，媽媽見到真係唔知好嬲定好笑，惟有寄望豬隊友喺媽媽嘅鞭策下，有朝一日可以成為神隊友！

1. 聲控老婆做嘢

老公見到BB出現一啲狀況，好似爆屎、爆喊，一定會第一時間向「老婆」求救，無論老婆忙緊咩都要聲控老婆嚟幫手，佢就係唔能夠單獨處理BB嘅日常事務。

2. 氹BB瞓自己瞓著先

老公話今晚氹BB瞓，媽媽終於可以抖一抖，沖個涼放鬆下。初初仲聽到老公同BB傾計，點知隔咗陣入房睇下，老公已經瞓著咗，仲扯緊鼻鼾，而BB依然眼仔碌碌毫無睡意。

3. 衫褲掉轉著

叫老公幫BB著衫褲，件衫總係卡住BB頭仔，而且著到甩甩漏漏，唔係件衫前後掉轉著，就係條褲底面掉轉咗，究竟有冇睇清楚先著！最肉酸係就咁著咗帶BB 出街，媽媽見到嗰下幾崩潰。

4. 沖奶溫度永遠唔啱

BB肚餓大喊，媽媽抱住佢安撫，叫老公幫手沖奶。湊咗BB一段時間，老公總算知道沖奶要落幾多水、幾多奶粉，但唔知點解溫度永遠唔啱，唔係太熱就太凍。

5. 唔覺意嘈醒BB

媽媽幾難先氹到BB瞓覺，可以放佢落床仔，點知老公出出入入，或者跌咗嘢啲聲已經嘈醒咗BB，嘥晒媽媽嘅心機，又要由零開始再氹BB瞓覺。

6. BB用品亂咁放

老公唔清楚屋企啲嘢放喺邊度，更加唔知BB用品擺喺邊度。有時媽媽行唔開，叫老公幫手攞件BB衫、清潔棉、尿片⋯⋯佢都要左搵右搵，最麻煩係冇將啲BB 用品放回原位，媽媽下次又有排搵。

Text: Mami Editorial