好心做壞事 3個民間偏方隨時害慘BB

舊時嘅資訊落後，好多老一輩都欠缺醫療知識，當BB遇到各種「奇難雜症」嘅時候，大家都會耳目相傳一啲偏法去醫治BB。直到今時今日，仍然有人傾向相信偏方嘅果效，為咗令BB可以盡快「康復」而使用偏方。以下呢3條偏方你未必聽過，但就曾有BB因此受到傷害，令爸爸媽媽心痛不已！

1.青提子汁退黃疸

初生BB有黃疸係好普遍嘅現象，有媽媽透露曾被長輩勸用青提子汁餵BB令黃疸盡快退去，媽媽雖然心知BB只可以飲奶，但最後仍然餵BB飲用。結果由於BB無法消化吸收奶以外嘅物質，出現腹脹同呼吸急促，最後要飽受插喉同不停打點滴之苦，直到所有被餵食嘅青提子汁完全抽晒出嚟為止。

2.發燒用酒精抹身

酒精喺皮膚上散發嘅速度好快，可以帶走更多熱量。但係酒精亦可以被皮膚吸收入血液裡面，有機會令BB出現顫抖、酒精過敏、肺炎，甚至死亡。所以兩歲或以下嘅嬰幼兒絕對唔可以用呢個方法退燒。

3.米袋壓心口定驚

BB由出世開始，好多時會無故半夜哭喊，老一輩會認為BB係因為驚慌而喊，所以會建議用一個裝咗一定分量米嘅袋仔壓喺BB心口，用嚟「定驚」。但有唔少新聞都報導過，BB瞓覺時會因為轉換動作而令米袋移位，最後令米袋壓喺BB面部，令BB窒息而死。

Text: Mami Editorial