生多個要有幾大勇氣 想生多個前考慮5件事

生咗一個小朋友後，媽媽經歷過湊B嘅「樂」與「怒」，當中有好多快樂嘅時刻，但辛苦絕對唔少得，好多媽媽對生第二個都有恐懼，冇勇氣再落入湊初生B嘅換片、餵奶無限循環中。其實生幾多個小朋友係每個家庭嘅選擇，如果有意生多個可以考慮以下5件事，再衡量自己嘅能力。

1. 經濟能力

成日話養一個小朋友要四百萬，仲要係好幾年前咁講，如果計番通貨膨漲，依家又點止四百萬。尿片、奶粉、日用品、供書教學通通都要錢，當然平有平養，貴有貴養，只要計過度過可以養多個就掂。

2. 體力

好現實，年紀愈大機能冇以前咁好，體能又差咗，仲有冇力湊小朋友呢？陪小朋友玩又跑又跳頂唔頂得順？如果覺得自己仲後生，或者唔後生但體能好，就唔使擔心畀小朋友玩殘。

3. 心理準備

經濟能力同體力嘅客觀條件預備好，但最重要係你同老公係咪有共識生多個，兩夫婦溝通好，先可以為迎接多一個小朋友做好準備。媽媽嘅心理素質好重要，佢哋可以話係屋企嘅精神領袖，如果媽媽都未準備好，勉強再生多個小朋友，對自己同屋企人都唔係好事。

4. 神隊友支持

如果你嘅另一半係神隊友要先恭喜你，生多個有神隊友嘅支持可以話成功咗一半。湊小朋友爸爸都有一半責任，如果所有嘢都靠媽媽，媽媽隨時身心疲累到爆煲。至於認定身邊人係豬隊友嘅話，就最好諗清楚，免得生多個時又畀豬隊友激到一肚氣。

5. 外援

屋企多一個小朋友需要增援，全職媽媽要有心理準備一打二，至於在職媽媽就要考慮原來嘅照顧者，可能係四大長老或者外傭，佢哋係咪可以湊多個，唔得就要再安排人手，確保小朋友得到最適當嘅照顧。

Text: Mami Editorial