點止媽媽咁簡單 多才多藝身兼5個職位

以前做女嗰陣可能咩都唔識，亦都唔需要識。但做咗媽媽之後，就會被激發出無限潛能，好多嘢都要邊學邊做，慢慢成為一個超人媽媽！喺媽媽呢個職業生涯中，隨時身兼以下呢5種職位：

1. 廚師

就算做女嗰陣對廚藝一竅不通，但由BB加固開始，媽媽就要為BB預備每餐糊仔或粥嘅材料，亦開始慢慢學識各種食材嘅處理方法。隨著BB長大，需要更多元化嘅食物配搭，媽媽亦要逐漸改進廚藝，學識更多烹調方法、食物配搭、調味料運用⋯⋯成為煮得一手好廚藝嘅媽媽。

2. 家務助理

有小朋友嘅家庭需要時刻保持整潔，媽媽每日都要將屋企打掃得一塵不染，確保小朋友健康唔易生病！另外，小朋友係整亂屋企嘅「高手」，媽媽亦要學識清潔各種電器、設備、物品，對於各種清潔劑嘅效能同用法都瞭如指掌；加上小朋友嘅玩具同物品眾多，媽媽都要變身「收納達人」，將小朋友嘅物品分類安放好之餘，亦要方便自己可以隨時拎出嚟畀小朋友用。

3.功課輔導導師

小朋友放學返到屋企，少不免會有一堆功課要做。為咗令小朋友可以快啲做晒功課瞓覺，媽媽都要兼負起功課輔導嘅導師角色，教小朋友做功課；如遇到小朋友要默書考試，更要幫佢哋溫習。

4.工藝導師

唔知由幾時開始，幼稚園、小學畀嘅功課都會加入親子元素，要求小朋友返屋企同爸爸媽媽一齊「動手做」，但某啲手工藝嘅製作步驟繁複，根本唔適合太細嘅小朋友做，所以實際上即係叫媽媽自己做，做擺設、整燈籠、縫製衫褲⋯⋯對媽媽嚟講都變成等閒事。有啲學校甚至送盆植物畀小朋友，要求小朋友完成一份植物生長紀錄嘅功課，即係要媽媽無啦啦打理多一樣嘢⋯⋯

5.拾荒者

小朋友嘅親子功課考爸爸媽媽創意之餘，亦都好講求環保，所以媽媽有時都要喺小朋友放假時一齊去執樹葉、樹枝、紙皮、石仔等物料去為小朋友完成一份功課。

Text: Mami Editorial