粉色BB房同成日笑嘅BB，都唔係事實嘅全部。當中嘅落差好大呀！

每個媽媽都想比最好嘅BB，相信好多媽媽都想為BB準備一間充滿溫暖感覺嘅柔和色系BB房。理想中，房入面好簡潔，會有BB嘅毛公仔，BB衫放得整整齊齊。

但回到現實，爸媽就會發現，嗰個係理想，係夢想。喺現實，地方有限，時間亦有限，以下嘅落差，係咪熟口熟面呢？

1. 柔和粉色系嘅BB房

溫暖又舒服嘅粉色BB房，同現實中相差最大。喺香港，BB床好多時係佔用爸媽書房嘅位置，或者直頭喺爸媽睡房。有啲家庭，可能甚至係連BB床都唔知放邊度好呢。

2. 擺放整齊嘅BB衫

整整齊齊咁放好BB衫嘅櫃仔係好難實現嘅，BB嘅衫，又細件，又多，分類放好已經足夠。BB出世之後，忙住日夜餵奶換片，大家仲邊有時間將BB衫擺放整齊呢？

3. BB成日甜笑

可怕嘅事實係，初生BB，喊多過笑㗎。要等佢地大少少，就會開始識笑識同爸媽玩，雖然喊依然係佢地表達需求嘅唯一方法，但開心佢地就會笑。

爸媽由親身湊B嘅第一刻開始，就會感受到現實同理想嘅唔同。雖然係咁，不過對爸媽黎講一啲都唔緊要，因為最重要嘅係BB，同埋同BB相處嘅時間。

Text: Mami Editorial