媽媽唔想錯過 BB嘅10個第一次

由BB出世開始，佢嘅每一個第一次喺媽媽眼中都係非常珍貴，「第一次」只會發生一次，媽媽當然唔想錯過，仲要隨時準備電話影低，之後可以睇相一再回憶。以下記錄BB嘅10個第一次，你係咪都見證到？

1. 第一次沖涼

即使產前聽過幾多講座，到真正落手幫BB沖涼可能係兩回事。BB由醫院返到屋企，邊個幫佢沖第一次涼？新手父母幫BB沖涼雞手鴨腳嘅場面點都要記低！

2. 第一次出街

BB第一次出街多數都係去健康院檢查，BB唔係瞓到豬仔就係喊到拆天。第一次帶BB出街好大陣仗，又驚佢吹親，仲要帶好多嘢，尿片、奶粉、濕紙巾⋯⋯

3. 第一次笑

見到BB第一次望住你甜笑，湊BB點辛苦、點唔夠瞓⋯⋯咩都唔記得晒，辛苦換來BB一個微笑好值得。

4. 第一次翻身

BB好似軟棉棉嘅麵糰，到3個月左右開始嘗試翻身，終於唔使成日瞓喺度，BB可以自己郁吓，見到佢咁努力翻身，你會覺得生命好奇妙。

5. 第一次食糊仔

踏入6個月，BB開始食固體食物，佢第一次食糊仔嘅反應係點呢，無論追住食定食到扁晒嘴都一樣咁可愛。

6. 第一次爬

放BB喺地下，佢好似毛毛蟲慢慢向前爬，有時又會向後爬，終於學識喺屋企周圍爬，係時候幫佢報名參加BB爬行大賽。

7. 第一次叫媽媽

「第一次叫媽媽」可能係媽媽最期待BB嘅第一次，有人話BB叫爸爸定媽媽先，嗰個就會辛苦啲，媽媽點會介意，每日都等住BB叫媽媽。

8. 第一次影證件相

想帶BB去旅行，要影張證件相申請護照。BB第一次影證件相媽媽出盡法寶引佢望鏡頭，佢唔喊已經偷笑，影出嚟個呆呆樣仲好深刻，呢張證件相一定要收藏。

9. 第一次行

見到BB扶住嘢慢慢企起身，經過幾多努力同練習終於企得穩，再跌跌撞撞踏出人生第一步，呢個絕對係歷史性時刻。

10. 第一次剪頭髮

BB頭髮長咗要剪吓，第一次剪頭髮有冇驚到喊？其實媽媽第一次幫BB剪頭髮仲緊張，幾驚剪到BB肉仔。

Text: Mami Editorial