幼兒開始「人有我有」心態 父母面對幼兒要求時可用嘅3個處理方法

踏入幼兒階段，小朋友開始上playgroup、讀幼稚園，認識其他同齡嘅小朋友。由呢個階段開始，小朋友會將自己同其他小朋友比較，當見到其他小朋友擁有自己冇嘅物品嗰陣，會諗：「點解人哋有而自己冇呢？」於是小朋友會萌生自己都要有嘅念頭，然後要求爸爸媽媽都提供相同嘅物品畀自己，令父母頭痛不已，究竟應該滿足小朋友嘅小小欲望？定係避免會有下一次嘅要求而拒絕呢？

1.令幼兒知道每個人都有差異

BB喺成長過程中會慢慢發展自我嘅觀念，當接觸到其他小朋友之後，會開始發現原來世界上唔止自己一個咁細小嘅人類，原來仲有其他同自己相似又唔完全一樣嘅小人類，幼兒會將自己同其他小朋友比較，慢慢去除自我中心嘅概念。當見到其他小朋友擁有一樣物品，自己都會想要。爸爸媽媽喺面對幼兒嘅要求時，唔好一開始就拒絕，因為幼兒渴望得到一樣嘢係冇對錯之分。但爸爸媽媽可以畀幼兒知道，幼兒或者想變得同其他人一樣，但是幼兒本身亦擁有其他人所冇嘅嘢。爸爸媽媽可以為幼兒提供到一啲物品，但未必可以提供到另一啲物品，畀幼兒接受到原來自己有時會同其他人一樣，有時又會唔一樣。

2. 鼓勵孩子表達

有時幼兒唔識表達自己、唔敢直接同爸爸媽媽講「我想要呢件物品」嗰陣，都會用「人有我都要有」嘅理由話畀爸爸媽媽知自己想要某樣嘢，咁爸爸媽媽就需要直接鼓勵幼兒講出自己真正諗法，係自己想要擁有，而唔係因為要同其他人比較。

3. 適時給予，適時拒絕

幼兒對每樣事物都充滿好奇心，亦會透過新事物觀察自己嘅行為係可唔可行。如果爸爸媽媽一聽到幼兒要求要某樣嘢就馬上忽視或拒絕，如講類似「咁你去做人哋個仔／女！」，背後涵義係「你再講爸爸媽媽就唔要你」，幼兒會覺得自己唔應該有呢種渴望同需要，如果唔係就會冇人愛自己。

但如果爸爸媽媽對幼兒所有要求都有求必應，亦會令幼兒覺得自己要咩有咩，無法接受被拒絕同現實情況。所謂嘅現實就係大人在應該給予時會給予；唔應該給予時就要拒絕，幼兒先可以接受現實。所以爸爸媽媽喺唔允許嘅情況下，要畀幼兒知道自己會有不被滿足嘅時候，慢慢了解到喺現實環境中，自己嘅需求係無法一一被滿足。

爸爸媽媽喺面對幼兒嘅要求而無法滿足時，應該畀幼兒知道爸爸媽媽能夠理解佢嘅心情，但唔會滿足到所有需求，之後可以轉移幼兒嘅視線、同幼兒一齊諗方法解決，或係由幼兒哭喊發洩，因為幼兒都需要呢啲時間體會現實生活，用自己能力解決問題。

Text: Mami Editorial